Երևանում գրանցվել է նոր ջերմաստիճանային ռեկորդ

Ինչպես կանխատեսվել էր, այսօր հանրապետությունում դիտվել է բարձր ջերմային ֆոն։ Օգոստոսի 2-ին Երևան քաղաքում գրանցվել է նոր ջերմաստիճանային ռեկորդ։

ՇՄՆ Հիդրոօդերևութաբանության և մոնիթորինգի կենտրոն ՊՈԱԿ-ի տվյալներով՝ օգոստոսի 2-ին, ժամը 17:00-ի սահմաններում, Երևանի ցածրադիր հատվածներում օդի ջերմաստիճանը բարձրացել է մինչև +41.9°C։

«Սա նոր ռեկորդ է տվյալ օրվա համար, մինչ այդ առավելագույնը կազմել էր +40.8°C, որը արձանագրվել էր 2000 թվականին»,- նշում են ՀՀ շրջակա միջավայրի նախարարությունից։

«Հիդրոօդերևութաբանության և մոնիթորինգի կենտրոն» ՊՈԱԿ-ի հաղորդմամբ, մի շարք վայրերում դիտված առավելագույն ջերմաստիճանները գերազանցել են այդ օրը երբևէ գրանցված արժեքները.

Արենի` 42.6°C

(40°C` 2011թ.),

Երևան` 41.9°C

(40.8°C` 2000թ.),

Արտաշատ` 40.9°C

(40.7°C` 2011թ.),

Ապարան` 33.5°C

(32.2°C` 2000թ.):

Ավելի վաղ հաղորդվել էր, որ հարավից արևադարձային տաք օդի ալիքի ներթափանցմամբ պայմանավորված՝ օգոստոսի 2-7-ին Արարատյան դաշտում, Վայոց ձորի նախալեռներում, Սյունիքի հովիտներում  և Երևանում սպասվում է բարձր ջերմային ֆոն․ ցերեկը ժամը 16։00-17-00- ն ընկած ժամանակահատվածում՝ +39․․․+41 աստիճան տաքություն։