Ճապոնիայի հետ առևտրային համաձայնագրի մասին ԱՄՆ նախագահ Դոնալդ Թրամփի հայտարարությունից հետո դոլարը կրկին անկում է արձանագրում, հաղորդում է Reuters-ը:
Ճապոնիայից ներմուծումների համար սահմանվել է 15% սակագին՝ ի տարբերություն սպասվող 25%-ի, որը պետք է ուժի մեջ մտներ օգոստոսի 1-ից։ Թրամփը նաև նշել է, որ Ճապոնիան մտադիր է 550 միլիարդ դոլարի ներդրում կատարել ԱՄՆ-ում։
Դոլարի ցուցիչը (Dollar index =USD), որը հետևում է դոլարի արժեքին մեծարժեք արժույթների նկատմամբ, հասել է 97.48-ի՝ երեք օր անընդմեջ անկում գրանցելուց հետո՝ մնալով հուլիսի 10-ից ի վեր ամենացածր մակարդակի մոտ։ Ցուցանիշը նվազել է 6.6%-ով:
«Դոլարի թուլությունը կարծես մեր մեկնարկային կետն է», – Reuters-ին ասել է Moomoo Australia-ի շուկայի վերլուծաբան Մայքլ ՄքՔարթին, – «Ակնհայտ է, որ այժմ շուկայում որոշակի հապաղում և զգուշավորություն կա դոլարի շուրջ, ինչը արտացոլվում է նաև պարտատոմսերի շուկաներում»։
Ամբողջ աշխարհում մաքսային տուրքերի վերաբերյալ անորոշությունը շարունակում է ճնշել փոխարժեքային շուկան՝ արժույթները պահելով հիմնականում նեղ տիրույթում:
Ճապոնիայի հետ համաձայնագրի լուրը դրական է անդրադարձել Ավստրալիայի և Նոր Զելանդիայի դոլարների վրա, թեև շուկայում զգուշավորությունը պահպանվել է։
