ԱՄՆ Ներկայացուցիչների պալատի խոսնակ Մայք Ջոնսոնը երեքշաբթի հայտարարել է, որ իր կարծիքով մինչև Մոսկվային Ուկրաինայում պատերազմը դադարեցնելու համար նախագահ Դոնալդ Թրամփի տված 50-օրյա վերջնաժամկետի ավարտը ԱՄՆ Կոնգրեսը չպետք է քննարկի Ռուսաստանի նկատմամբ պատժամիջոցների հարցը, այս մասին հաղորդում է Reuters-ը։
«Մենք խոսեցինք Ռուսաստանի դեմ պատժամիջոցների մասին։ Սակայն կարծում եմ, որ Ներկայացուցիչների պալատն ու Սենատը համաձայն են, որ Սպիտակ տունը սահմանել է այս 50-օրյա ժամկետը, և մենք պետք է թույլ տանք գերագույն գլխավոր հրամանատարին, վարչակազմին, պաշտպանության նախարարին և Պենտագոնին անել այն, ինչ պատրաստվում են անել, և կտեսնենք, թե ինչպես կզարգանան իրադարձությունները», -նշել է Ջոնսոնը։
Կոնգրեսի որոշ անդամներ պնդում են Ռուսաստանի նկատմամբ խիստ պատժամիջոցների կիրառման անհրաժեշտությունը, ներառյալ՝ Սենատի երկու կուսակցությունների 85 անդամների համահեղինակած օրինագիծը, որը նախատեսում է 500-տոկոսանոց մաքսատուրք սահմանել այն երկրների համար, որոնք ռուսական նավթ, գազ, ուրան և այլ արտահանվող այլ ապրանքներ են գնում։
Չինաստանը և Հնդկաստանը կազմում են Ռուսաստանի միջազգային էներգետիկ բիզնեսի մոտ 70%-ը, որը նպաստում է նրա պատերազմական ջանքերի ֆինանսավորմանը։ Սակայն Սենատի և Ներկայացուցիչների պալատի հանրապետական առաջնորդները հայտարարել են, որ առանց Թրամփի հաստատման որևէ պատժամիջոցների մասին օրինագիծ չեն դնի քվեարկության։
Թրամփը հուլիսի 14-ին սպառնաց խիստ պատժամիջոցներ կիրառել Ռուսաստանի և ռուսական նավթ գնող երկրների նկատմամբ, սակայն Մոսկվային 50 օր ժամանակ տվեց հրադադարի շուրջ բանակցելու համար։ Ջոնսոնը կոչ արեց դադարեցնել պատերազմը։