Հատուկ տրիբունալի ստեղծման համաձայնագիրը նախօրեին Ստրասբուրգում ստորագրել են ԵԽ գլխավոր քարտուղար Ալեն Բերսեն եւ Ուկրաինայի նախագահ Վլադիմիր Զելենսկին։ Եվրոպայի խորհրդի մամուլի բաժնից «Ռադիոլուրին» հայտնել են, որ ստորագրվել է նաեւ Հատուկ տրիբունալի կանոնադրությունը։
«Սա տրիբունալ է, որը դատելու է` ով է զոհ, ով ագրեսոր, հստակեցնելու պատասխանատվության միջոցները, քանի որ առանց պատասխանատվության չի կարող լինել երկարատև խաղաղություն Ուկրաինայի և ամբողջ Եվրոպայի համար»,- ասված է հաղորդագրության մեջ։
Հատուկ տրիբունալը պետք է դատի Ուկրաինայի վրա Ռուսաստանի լայնածավալ հարձակման համար պատասխանատու քաղաքական եւ ռազմական բարձրագույն ղեկավարությունը։ Սակայն նրանց կարող են դատել միայն պաշտոնը թողնելուց հետո։