Ռուսիոյ նախագահ Վլատիմիր Փութին Ս. Փեթերսպուրկի տնտեսական համախմբումի ընթացքին յայտարարեց, որ Իրան Մոսկուայէն զինուորական աջակցութիւն չէ խնդրած, եւ երկու երկիրներուն միջեւ կնքուած գործընկերութեան համաձայնագիրը որեւէ զինուորական գործակցութիւն չի ներառեր:
Ան շեշտեց, որ չ՛ուզեր նոյնիսկ քննարկել Իրանի գերագոյն հոգեւոր պետ այաթոլլա Ալի Խամենէիի սպանութեան կարելիութիւնը:
Ռուսիոյ նախագահը ըսաւ, որ Իսրայէլի եւ Իրանի միջեւ «յարմար լուծում մը» տակաւին կարելի է` նշելով, որ իսրայէլեան վերջին հարուածները իրանեան պետութեան նկատմամբ «ժողովրդային զօրակցութիւնը ամրապնդեցին»:
Ան շարք մը լրագրողներու ներկայութեան պատկերասփռուած մամլոյ ասուլիսի ընթացքին նշեց, որ խնդիրը «նուրբ» է, սակայն լուծելի է, եթէ կամքը ապահովուի:
Ռուսիոյ նախագահը խօսեցաւ «երկու կողմերու շահերուն համընկնող կարելի համաձայնութեան» մը մասին:
Ռուսիոյ արտաքին գործոց նախարարութեան բանբեր Մարիա Զախարովա զգուշացուց Միացեալ Նահանգները Իրանի մէջ որեւէ զինուորական միջամտութիւն կատարելէ` նշելով. «Ատիկա պիտի ըլլայ չափազանց վտանգաւոր քայլ մը, որ անկանխատեսելի հետեւանքներ կը պարունակէ»:
«Մոսկուան Իրանի մէջ հիւլէական խաղաղ կայաններուն վրայ Իսրայէլի յարձակումները կը նկատէ բացարձակապէս անընդունելի», նշեց Զախարովա` աւելցնելով. «Ասիկա Իսրայէլի կողմէ ոճրային արկածախնդրութիւն մըն է, որ կը վտանգէ շրջանային ու համաշխարհային անվտանգութիւնը, եւ այդ յարձակումները հիւլէական զէնքի տարածումը արգիլելու պատրուակներով արդարացնելու փորձերը անհեթեթութիւն են»:
Ան նշեց, որ Ռուսիան մասնաւորաբար մտահոգ է յարձակումներէն Պուշահր հիւլէական կայանին վրայ, ուր ռուս մասնագէտներ կը գործեն: