Իսրայելի վարչապետ Բենիամին Նեթանյահուն մամուլի ասուլիսի ժամանակ հայտարարել է, որ Իսրայելի ռազմական գործողությունները Իրանի դեմ հետապնդում են երեք հիմնական նպատակ։ Նրա խոսքերը փոխանցում է ՏԱՍՍ-ը։
Նեթանյահուի խոսքով՝ Իսրայելը ձգտում է.
- Իրանի միջուկային ծրագրի ոչնչացման,
- Հրթիռային ծրագրի վերացման,
- Եվ այսպես կոչված «ահաբեկչության առանցքի» վերացման։
Նա չի բացառել, որ այս գործողությունների արդյունքը կարող է լինել իշխանափոխությունը Իրանում։
Վարչապետը նաև նշել է, որ Իսրայելը ժամանակին հնարավորություն է տվել խաղաղ ճանապարհով լուծել Իրանի միջուկային խնդիրը, սակայն այժմ վճռական է տրամադրված ռազմական գործողությունները հասցնել հաղթական ավարտի։
Հունիսի 13-ի գիշերը Իսրայելը սկսել է լայնածավալ հարվածներ Իրանի միջուկային օբյեկտների դեմ։ Հարվածների թիրախ են դարձել նաև բարձրաստիճան զինվորականներ և միջուկային գիտնականներ։ Ի պատասխան՝ Թեհրանը հարվածներ է հասցնում Թել Ավիվին և Իսրայելի ռազմական օբյեկտներին։
Իրանում հայտարարել են, որ հակամարտությունը կարող է շարունակվել առաջիկա շաբաթներին, և «պատերազմի մասշտաբները, հնարավոր է, ավելի լուրջ բնույթ ստանան»։ Միևնույն ժամանակ, իսրայելական աղբյուրների գնահատմամբ՝ գործողությունների ներկայիս ինտենսիվության պայմաններում հակամարտությունը կարող է ավարտվել «մի քանի օրվա ընթացքում»։