Երուսաղեմում գտնվող 17 ՀՀ քաղաքացիներ այս պահին սպասում են Հայաստանի իշխանությունների արագ արձագանքին և հստակ ուղեցույցի։ Այս մասին Facebook-ի իր էջում գրել է Լիլիթ Ղարիբյանը՝ նշելով, որ իրենց թվում է նաև իր ընկերուհին։
Նրա խոսքով՝ տեղում իրավիճակը փոխվում է գրեթե ամեն ժամ, և մարդիկ, գտնվելով օտար երկրում, չպետք է զգան իրենց մենակ։ «Մենք հասկանում ենք, որ իրավիճակը բարդ է, բայց մեր հայրենակիցները չպետք է մենակ մնան», — գրել է նա։
Ղարիբյանը կոչ է արել ՀՀ Արտաքին գործերի նախարարությանը, կառավարության համապատասխան կառույցներին, Տուրիզմի հայկական ֆեդերացիային և Իսրայելում ՀՀ դեսպանությանը՝ հնարավորինս արագ արձագանքել և աջակցել քաղաքացիներին։ «Նրանց պետք է հստակեցում, ուղղություն, անվտանգություն։ Եկեք համախմբվենք ու ձայն դարձնենք նրանց կարիքը», — նշել է նա։