«Չինական կամուրջը» չինարենի՝ աշխարհի խոշորագույն մրցույթներից մեկն է՝ նախատեսված չինարեն սովորող օտարերկրացի ուսանողների համար։ Այն համախմբում է լեզվի և մշակույթի նկատմամբ հետաքրքրություն ունեցող տաղանդավոր երիտասարդների՝ աշխարհի տարբեր ծայրերից։
«Հայաստանն այնպիսի աշխարհաքական դիրքում է, որ իրար է միացնում տարբեր քաղաքակրթություններ. կամուրջ է Ասիայի և Եվրոպայի միջև։ Չինարենը նույնպես հանդիսանում է կամուրջ։ Եվ եթե այդ տեսանկյունից դիտենք, ապա նմանատիպ միջոցառումները նպաստում են հայ-չինական հարաբերությունների, նաև մշակույթային կապերի զարգացմանը։ Հույս ունեմ, որ ապագայում նմանատիպ միջոցառումները էլ ավելի շատ կլինեն և այդ կամուրջն ավելի կընդլայնվի»,–լրագրողների հետ զրույցում ասաց Հայաստանում Չինաստանի դեսպան Լի Սինվեյը։
Մրցույթին երեք տարիքային խմբի ներկայացուցիչներ էին մասնակցում՝ ուսանողներ, միջին և տարրական դպրոցի աշակերտներ։ «Չինական կամուրջ» միջազգային մրցույթի ամենափոքր մասնակիցը 10 տարեկան էր։
Մրցանակներ տրվեցին լավագույն գեղարվեստական համար և լավագույն հռետորական ճառ անվանակարգերում։ Ժյուրին ուշադրություն էր դարձնում մասնակիցների ներկայացրած մշակութային ծրագրին և լեզվի իմացությանը։ Դպրոցականների միջին տարիքային խմբում իր ներկայացրած կոլիգրաֆիայի համար հաղթող ճանաչվեց Սոս Վարդանյանը. աա աշնանը կմեկնի Չինաստան՝ մասնակցելու «Չինարենի կամուրջ» մրցույթի եզրափակիչ փուլին։