Առողջապահության նախարար Անահիտ Ավանեսյանի վարորդը կստանա խիստ նկատողություն, այս մասին հայտարարել է նախարարը՝ արձագանքելով իրավապաշտպան Դանիել Իոաննիսյանի հրապարակած տեսանյութին։
Տեսանյութում երևում է, որ ԱՆ ծառայողական 006LL55 համարներով մեքենայի դիմացի նստարանին մանկահասակ երեխա է երթևեկում, ամրագոտին կապված չէ, քարսիթ նույնպես առկա չէ։
Իոաննիսյանը մոտենում է մեքենային, զրուցում վարորդի հետ, որը ընդունում է, որ Ավանեսյանի վարորդն է։
Նախարարն արձագանքել է Իոաննիսյանի գրառմանը՝ շնորհակալություն հայտնելով նրան վերահսկողության ու լուսաբանման համար և պարզաբանել, որ ծառայողական մեքենան ավտոլվացման կետ տանելիս վարորդը խախտում է կատարել՝ դրսևորելով անթույլատրելի վարքագիծ` երեխայի անվտանգության առումով:
«Դիպվածը կստանա իրավական գնահատական, իսկ վարորդը` նաև խիստ նկատողություն»,- տեղեկացրել է Ավանեսյանը:
