Իրանը և Միացյալ Նահանգները դեռևս հեռու են Իրանի միջուկային ծրագրի շուրջ տարաձայնությունները լուծելու համար համաձայնագրի կնքումից, հայտարարել է Իրանի արտաքին գործերի նախարարության ղեկավար Աբբաս Արաղչին։ «ԶԼՄ-ները շահարկում են Իրանի և Միացյալ Նահանգների միջև առաջիկա համաձայնագրի մասին: Ես չեմ կարող ասել, որ այն ձեռք է բերվել: Իրանը անկեղծորեն ձգտում է դիվանագիտական կարգավորման, որը կբավարարի բոլոր կողմերի շահերը: Սակայն այս նպատակին հասնելու համար անհրաժեշտ է համաձայնագիր, որը լիովին կվերացնի բոլոր պատժամիջոցները և կպահպանի Իրանի իրավունքները խաղաղ միջուկային էներգիայի, այդ թվում՝ ուրանի հարստացման վերաբերյալ: Համաձայնագրի ճանապարհը ոչ թե լրատվամիջոցների, այլ բանակցությունների միջոցով է», – գրել է Արաղչին X-ում։
Ավելի վաղ CNN-ը և մի շարք այլ արևմտյան լրատվամիջոցներ հաղորդել էին, որ Վաշինգտոնը և Թեհրանը կարող են մոտ ապագայում համաձայնագիր կնքել միջուկային էներգիայի վերաբերյալ։
Չորեքշաբթի օրը ԱՄՆ նախագահ Դոնալդ Թրամփը նույնպես հայտարարել է, որ իր վարչակազմը «շատ մոտ է Իրանի միջուկային խնդրի լուծմանը» և կոչ է արել Իսրայելի վարչապետ Բենիամին Նեթանյահուին չհարվածել Իրանին։