Հնդկաստանի բանակը հայտնել է, որ հետ է մղել Պակիստանի կողմից արևմտյան սահմանի երկայնքով իրականացված մի շարք անօդաչու հարձակումներ։ Բանակի հայտարարության համաձայն՝ հինգշաբթի գիշերն ու ուրբաթ առավոտյան Պակիստանի զինված ուժերը իրականացրել են «բազմակի հարձակումներ»՝ օգտագործելով անօդաչու սարքեր և այլ զինամթերք՝ Հնդկաստանի ամբողջ արևմտյան սահմանի երկայնքով։ Հաղորդվում է, որ միջուկային զենք ունեցող երկու հարևան պետությունների միջև լարվածությունը կրկին սրվել է։
Ստեղծված իրավիճակն ընկալվում է որպես պատասխան՝ Հնդկաստանի կողմից չորեքշաբթի օրը Պակիստանի տարածքում իրականացված հարվածներին, որոնք, ըստ Հնդկաստանի, ուղղված են եղել «ահաբեկչական ճամբարներին»։ Այս գործողությունները պայմանավորված էին Հնդկաստանի Քաշմիրում տեղի ունեցած հարձակումով։
«Անօդաչու սարքերի հարձակումները հաջողությամբ չեզոքացվել են, և հրադադարի խախտումներին տրվել է համարժեք պատասխան»,-հայտնում է Հնդկաստանի բանակը՝ ընդգծելով, որ բոլոր «չարամիտ մտադրություններին» կտրվի «ուժային արձագանք»։