Iravaban.net-ը ուսումնասիրել է Իրավական ակտերի նախագծերի հրապարակման e-draft.am կայքում ՀՀ կառավարության հանրային քննարկման ներկայացված «Հայաստանի Հանրապետության կառավարության 2026 թվականի փետրվարի 26-ի N 224-Ն որոշման մեջ լրացումներ կատարելու մասին» որոշման նախագիծը։
Ի՞նչ փոփոխություններ են նախատեսվում
Նախագծով առաջարկվում է լրացնել Հայաստանի Հանրապետության կառավարության 2026 թվականի փետրվարի 26-ի N 224-Ն որոշմամբ սահմանված՝ պետությանը կամ համայնքին սեփականության իրավունքով պատկանող հողամասերում առկա օրինականացման ենթակա ինքնակամ կառույցների ցանկը։
Նախագծի հիմնավորման համաձայն՝ գործող ցանկերում ընդգրկվել են հիմնականում մանկապարտեզները, դպրոցները և դրանց հետ սերտորեն կապված օժանդակ շինությունները։ Սակայն ՀՀ մարզերի համայնքներում և Երևան քաղաքում պետական ու համայնքային հողամասերում առկա են նաև այլ ինքնակամ կառույցներ, որոնք չեն ներառվել կառավարության սահմանած ցանկերում։
Ո՞ր կառույցներն են նախատեսվում ներառել ցանկում
Նախագծի նպատակն է լրացնել օրինականացման ենթակա ինքնակամ կառույցների ցանկը՝ ներառելով այն կառույցները, որոնք առկա են պետությանը կամ համայնքին սեփականության իրավունքով պատկանող հողամասերում, սակայն նախկինում չեն ընդգրկվել համապատասխան ցանկերում։
Նախագծի ընդունման դեպքում կստեղծվի իրավական հիմք՝ լրացուցիչ ցանկում ներառված ինքնակամ կառույցների օրինականացման համար։
Ինչո՞վ է պայմանավորված փոփոխության անհրաժեշտությունը
Նախագծի հիմնավորման համաձայն՝ կառավարության 2026 թվականի փետրվարի 26-ի N 224-Ն որոշմամբ սահմանված ցանկերը կազմվել են սեղմ ժամկետներում, ինչի հետևանքով դրանցում ընդգրկվել են հիմնականում կրթական հաստատությունները և դրանց հետ կապված օժանդակ շինությունները։
Արդյունքում՝ մարզերում և Երևանում պետական ու համայնքային հողամասերում գտնվող մի շարք օրինականացման ենթակա ինքնակամ կառույցներ դուրս են մնացել սահմանված ցանկերից։
Նշված խնդիրը լուծելու նպատակով առաջարկվում է լրացումներ կատարել կառավարության համապատասխան որոշման մեջ։
Ո՞ր մարմիններն են մասնակցել նախագծի մշակմանը
Նախագիծը մշակվել է ՀՀ տարածքային կառավարման և ենթակառուցվածքների նախարարության կողմից՝ ՀՀ մարզպետների աշխատակազմերի, համայնքապետարանների, Երևանի քաղաքապետարանի, Պետական գույքի կառավարման կոմիտեի և Ջրային կոմիտեի համագործակցությամբ։
Ի՞նչ արդյունք է ակնկալվում
Նախագծի ընդունմամբ նախատեսվում է լրացնել օրինականացման ենթակա ինքնակամ կառույցների ցանկը և իրավական հիմք ստեղծել համապատասխան կառույցների օրինականացման համար։
Նախագծի հիմնավորման համաձայն՝ դրա ընդունմամբ ՀՀ պետական բյուջեի եկամուտների կամ ծախսերի ավելացում կամ նվազեցում չի նախատեսվում։
Ո՞րն է նախագծի իրավական հիմքը
Նախագիծը մշակվել է՝ հիմք ընդունելով «Հայաստանի Հանրապետության քաղաքացիական օրենսգրքում լրացումներ և փոփոխություններ կատարելու մասին» 2021 թվականի դեկտեմբերի 16-ի ՀՕ-397-Ն օրենքում լրացումներ կատարելու մասին 2025 թվականի դեկտեմբերի 17-ի ՀՕ-489-Ն օրենքի 2-րդ հոդվածի 2-րդ մասը։
Նախագիծը չի հակասում Հայաստանի վերափոխման ռազմավարություն 2050-ին, ՀՀ կառավարության 2021-2026 թվականների ծրագրին և ոլորտային այլ ռազմավարական փաստաթղթերին։
Նշում․ խոսքը կառավարության որոշման նախագծի մասին է։ Ինքնակամ կառույցների օրինականացման հնարավորությունը կախված կլինի նախագծի ընդունումից և համապատասխան կառույցների՝ սահմանված ցանկում ներառվելուց։