Իրանը կոչնչացնի ԱՄՆ տվյալների կենտրոններն ու մալուխները Պարսից ծոցում, եթե Վաշինգտոնը վերսկսի պատերազմը, իրանական Press TV-ին տված հարցազրույցում սպառնացել է Իրանի Գերագույն ազգային անվտանգության խորհրդի քարտուղար Մոհսեն Ռեզաին:
«Միացյալ Նահանգները չափազանց թանկարժեք ակտիվներ ունի Արաբական Միացյալ Էմիրություններում և Հորմուզի նեղուցի շուրջ, – ասել է նա,- Մենք դեռ չենք ներառել այս ակտիվները մեր թիրախների շարքում: Սակայն եթե պատերազմ սկսվի, այդ մալուխներից, տվյալների կենտրոններից, արհեստական բանականության օբյեկտներից և բազմաթիվ այլ վայրերից շատերը կոչնչացվեն»:
Ռեզաին այդ ակտիվներն անվանել է «ամերիկյան տնտեսության զարկերակ այս տարածաշրջանում» և ասել, որ դրանց «արժեքը գերազանցում է 2 տրիլիոն դոլարը»։
Նա նաև վստահեցրել է, որ Իրանը «լիովին պատրաստ է» գործի դնել ռազմական նոր հնարավորություններ, եթե ԱՄՆ-ն կրկին հարձակվի։
«Մենք առաջին շաբաթում չգործեցինք այնպես, որ բացահայտեինք մեր բոլոր հնարավորությունները։ Եթե դա անեինք, հետագայում օգտագործելու քիչ բան կունենայինք», – ասել է նա։
«Այսօր, եթե տեղի ունենա ևս մեկ բախում, մենք անպայման թշնամուն կառերեսվենք շատ ավելի լայն և լայնածավալ ծրագրով»,- հավելել է նա։
Նավթի «մաքսանենգ ցանց» Հորմուզում
Ռեզաին ԱՄՆ զինված ուժերի կենտրոնական հրամանատարության (CENTCOM) ղեկավարին մեղադրել է Հորմուզի նեղուցով ԱՄԷ զինված ուժերի աջակցությամբ մաքսանենգ ճանապարհով նավթի տեղափոխումը կազմակերպելու մեջ:
«Վերջին երկու-երեք ամիսների ընթացքում մենք միջինը ամեն գիշեր հարվածել ենք այս մաքսանենգ նավերից հինգին: Սրանք հենց այն գործողություններն են, որոնք վերահսկում է ԱՄՆ կենտրոնական հրամանատարության հրամանատարը»,- ասել է նա:
Նա պնդել է, որ «ԱՄԷ զինված ուժերի անձնակազմ» է տեղակայվել և օգտագործվել «այդ գործողություններին աջակցելու համար»։
Նա նաև ԱՄՆ նախագահին է մեղադրել այս գործողություններում ներգրավված լինելու մեջ: «Թրամփը համագործակցել է մի շարք մաքսանենգների հետ Օմանի այս ժայռոտ ափամերձ ջրերում՝ մաքսանենգ գործողություններ իրականացնելու համար»,- նշել է նա։
Ռեզաին նաև ասել է, որ ԱՄՆ-ն ընդունել է Իրանի յոթ կետանոց առաջարկների մի մասը միայն, մյուսները թողել է անպատասխան, ինչը, ըստ նրա, «անբավարար է»:
ԱՄՆ կենտրոնական հրամանատարությունը դեռ չի արձագանքել իրանցի բարձրաստիճան պաշտոնյայի հայտարարություններին: