Շարունակական մասնագիտական զարգացման կրեդիտներ հավաքելու ժամանակահատվածում բուժաշխատողի աշխատատեղը պահպանվում է, իսկ յուրաքանչյուր աշխատանքային տարվա համար պահպանվում է նաև առնվազն 10 օրվա հիմնական աշխատավարձը։ Այդ իրավունքը տրվում է միայն տվյալ տարում և հաջորդ տարիներ չի փոխանցվում։ Իսկ հնգամյա շրջափուլում ավագ բուժաշխատողը պետք է հավաքի առնվազն 220 կրեդիտ։
Ինչպես տեղեկացնում է Iravaban.net-ը, կարգավորումները սահմանված են «Բնակչության բժշկական օգնության և սպասարկման մասին» օրենքի 33-րդ և 34-րդ հոդվածներով, իսկ պարտադիր դասընթացների վերջին փոփոխությունը՝ Կառավարության 2026 թվականի սեպտեմբերի 17-ի N 1348-Ն որոշմամբ, որն ուժի մեջ է հոկտեմբերի 1-ից։
Ի՞նչ երաշխիք է սահմանում օրենքը
Օրենքի 33-րդ հոդվածի 2.1-ին մասով կրեդիտների ապահովման ժամանակահատվածում պահպանվում են բուժաշխատողի՝ պայմանագրով սահմանված աշխատատեղը, ինչպես նաև յուրաքանչյուր աշխատանքային տարվա համար առնվազն 10 օրվա հիմնական աշխատավարձը։
Այդ ժամկետը գերազանցող օրերի համար աշխատավարձի պահպանումը կարգավորվում է գործատուի և բուժաշխատողի փոխադարձ համաձայնությամբ։
Գործընթացի սկիզբն արձանագրվում է բուժաշխատողի՝ գործատուին ներկայացրած դիմումով, իսկ ավարտը՝ ՇՄԶ հավաստագրի առկայությամբ։
Ուշադրություն. 2.2-րդ մասով 10 օրվա իրավունքը տրվում է միայն տվյալ աշխատանքային տարում և չիրացվելու դեպքում հաջորդ տարիներ չի փոխանցվում։
Քանի՞ կրեդիտ է պահանջվում
33-րդ հոդվածի 4-րդ մասով յուրաքանչյուր հնգամյա շրջափուլում պահանջվում է՝
- ավագ բուժաշխատողների համար՝ առնվազն 220 կրեդիտ, բացառությամբ դեղագետների, որոնց համար՝160,
- միջին բուժաշխատողների համար՝ առնվազն 140, բացառությամբ դեղագործների, որոնց համար՝100։
Կրտսեր բուժաշխատողները, օրենքի 2-րդ հոդվածի 22-րդ կետով, ՇՄԶ գործընթաց չեն անցնում և հավաստագիր չեն ստանում։
Ի՞նչ տեսակի կրեդիտներ պետք է լինեն
33-րդ հոդվածի 3-րդ մասով կրեդիտները պետք է լրացվեն երեք տեսակի գործունեությամբ՝ տեսական գիտելիքների զարգացում՝ դասընթացների, սեմինարների և գիտաժողովների միջոցով, գործնական հմտությունների զարգացում՝ աշխատանքային տեղում մասնագիտական կատարելագործման միջոցով, և ինքնակրթություն՝ հեռավար կամ առցանց դասընթացների, գիտական աշխատանքների հրատարակման միջոցով։
Իսկ 4.1-ին մասով կրեդիտների քանակը լրացվում է ինչպես բուժաշխատողի ընտրածմիջոցառումներով, այնպես էլ Կառավարության հաստատած պարտադիր միջոցառումների ցանկում ներառված բոլոր միջոցառումներով։
Կա՞ անվճար կրեդիտ ստանալու հնարավորություն
Այո։ Օրենքի 31.2-րդ հոդվածի 1-ին մասի 9-րդ կետով ասոցիացիաներն իրենց անդամների համար պարտավոր են անվճար հիմունքներով ապահովել տարեկան առնվազն 10 ՇՄԶ կրեդիտ։
Ի՞նչ հետևանք է առաջանում կրեդիտները չհավաքելու դեպքում
Օրենքի 34-րդ հոդվածով պատկերը հետևյալն է։
Եթե վերջին հինգ տարում հավաքվել է նվազագույն քանակի 70 տոկոսը, բուժաշխատողն իրավունք ունի մասնագիտական գործունեությունը շարունակելու համար անցնելու թեստավորում և դրա հիման վրա ստանալու հավաստագիր։
Եթե 70 տոկոսի շեմը հաղթահարված չէ, թեստավորման հնարավորություն չի տրվում. չբավարարող կրեդիտները պետք է լրացվեն 33-րդ հոդվածի պահանջներին համապատասխան։
Առանձին հիմք է ստաժը. 34-րդ հոդվածի 5-րդ մասով, եթե վերջին հինգ տարում առնվազն երեք տարվա մասնագիտական գործունեություն իրականացրած չէ, հավաստագիր ստանալու համար ևս անցնում է թեստավորում։
Հավաստագրի տրամադրման մերժումը կարող է բողոքարկվել վարչական կամ դատական կարգով։
Ի՞նչ է նշանակում հավաստագիր չունենալը
Օրենքի 28-րդ հոդվածի 1-ին մասի 9-րդ կետով բժշկական օգնություն և սպասարկում իրականացնողը պարտավոր է լուծել անհատական լիցենզիա կամ անցումային անհատական լիցենզիա չունեցող անձի, ինչպես նաև միջին բուժաշխատող հանդիսացող և հավաստագիր չունեցող անձի հետ կնքված աշխատանքային կամ ծառայությունների մատուցման պայմանագիրը կամ ազատել նրան զբաղեցրած պաշտոնից։
Որքա՞ն ժամկետով է տրվում հավաստագիրը
34-րդ հոդվածով այն տրվում է հինգ տարի ժամկետով, իսկ դիմումը ներկայացվում է ժամկետի ավարտից առնվազն երեք ամիս առաջ։ Հավաստագիրը տրվում է պետական տուրք վճարելու, կրեդիտների նվազագույն քանակը լրացնելու և վերջին հինգ տարում առնվազն երեք տարվա մասնագիտական գործունեություն իրականացնելու դեպքում։
Ի՞նչ է փոխվել հոկտեմբերի 1-ից
N 1348-Ն որոշմամբ վերաշարադրվել է պարտադիր միջոցառումների ցանկի 1-ին կետը՝ «Արտակարգ իրավիճակներում առաջին բուժօգնություն» դասընթացը։
Տևողությունը 12 ժամ է, այսինքն՝ 12 կրեդիտ, որից 7-ը տեսական, 5-ը՝ գործնական։ Թիրախային լսարանը ավագ և միջին բուժաշխատողներն են։
Ծրագիրը ներառում է ABCDE գնահատումը, սիրտ-թոքային վերակենդանացումը մեծահասակների և երեխաների համար, ավտոմատ արտաքին դեֆիբրիլյատորի օգտագործումը, շնչուղիների անցանելիությունը, վնասվածքների, արյունահոսությունների, այրվածքների և կոտրվածքների դեպքում օգնությունը, ինչպես նաև անաֆիլակտիկ շոկի, ջղաձգումների, կաթվածի, հիպոգլիկեմիայի, թունավորումների և ջերմային հարվածի դեպքերը։
Ամենակարևոր փոփոխությունն այն է, որ որոշման 3-րդ կետով դասընթացի գործնական բաղադրիչն այսուհետ կազմակերպվում է բացառապես առկա ձևաչափով։
Ինչպե՞ս չշփոթել հավաստագիրը լիցենզիայի հետ
Դրանք տարբեր փաստաթղթեր են։ ՇՄԶ հավաստագիրը, օրենքի 2-րդ հոդվածի 37-րդ կետով, ինքնուրույն մասնագիտական գործունեությունը շարունակելու թույլտվությունն է՝ կրեդիտներ հավաքելու հիման վրա։ Իսկ անհատական լիցենզիան, 22.2-րդ կետով, ավագ բուժաշխատողի՝ մասնագիտական գործունեության որոշակի տեսակով զբաղվելու իրավունքը հաստատող պաշտոնական թույլտվությունն է։
Առողջապահության նախարարության վերջին պարզաբանմամբ ավագ բուժաշխատողները պետք է անհատական լիցենզիա ստանան մինչև 2027 թվականի հուլիսի 1-ը, իսկ կենտրոնացված քննությունների հայտերի ներկայացման վերջնաժամկետը 2027 թվականի հունվարի 1-ն է։
Ամփոփում
Ամփոփելով՝ կրեդիտներ հավաքելու ժամանակահատվածում պահպանվում են բուժաշխատողի աշխատատեղը և տարեկան առնվազն 10 օրվա հիմնական աշխատավարձը, որը հաջորդ տարի չի փոխանցվում, գործընթացը սկսվում է գործատուին ներկայացվող դիմումով, հնգամյա շրջափուլում ավագ բուժաշխատողը պետք է հավաքի 220 կրեդիտ, դեղագետը՝ 160, միջինը՝ 140, դեղագործը՝ 100, ասոցիացիաներն անդամներին տարեկան առնվազն 10 կրեդիտ ապահովում են անվճար, նվազագույն քանակի 70 տոկոսը հավաքած բուժաշխատողը կարող է հավաստագիր ստանալ թեստավորմամբ, հավաստագիր չունեցող միջին բուժաշխատողի հետ գործատուն պարտավոր է լուծել պայմանագիրը, իսկ հոկտեմբերի 1-ից առաջին բուժօգնության 12-ժամյա պարտադիր դասընթացի գործնական մասը կազմակերպվում է բացառապես առկա ձևաչափով, – տեղեկացնում է Iravaban.net-ը։
Բժիշկների անհատական լիցենզավորման մասին կարդացեք այս նյութում, իսկ լիցենզավորման ժամկետների երկարաձգման մասին՝ այստեղ։
Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։