Iravaban.net–ը ուսումնասիրել է կառավարության հոկտեմբերի 1-ի նիստում ընդգրկված նախագիծը, որով առաջարկվում է փոփոխություն և լրացում կատարել Առողջության համընդհանուր ապահովագրության ռեգիստրում տվյալների հավաքման, վարման և փոխանցման կարգում։
Նախագծի հիմնավորման համաձայն՝ դրա ընդունումը պայմանավորված է «Առողջության համընդհանուր ապահովագրության մասին» օրենքում լրացումներ և փոփոխություններ կատարելու մասին» 2026 թվականի ապրիլի 7-ի ՀՕ-135-Ն օրենքի ընդունմամբ։
Ի՞նչ փոփոխություն է նախատեսվում ռեգիստրում
Նախագծով առաջարկվում է Հայաստանի Հանրապետության կառավարության 2026 թվականի հունվարի 8-ի N 25-Ն որոշման հավելվածի 2-րդ կետը լրացնել նոր նախադասությամբ։
Նախատեսվում է, որ ռեգիստրում կներառվեն նաև առողջության համընդհանուր ապահովագրություն ունեցող բնակչության խմբերում չընդգրկված այն անձանց անձնական և ոչ անձնական տվյալները, որոնք օրենսդրությանը համապատասխան ունեն համապատասխան վիճակ կամ կարգավիճակ և ստացել են օրենքով նախատեսված բժշկական օգնության և սպասարկման նվազագույն ծավալ և լրացուցիչ ծառայություններ։
«Առևտրային գաղտնիք» հասկացությունը կհանվի
Նախագծով առաջարկվում է նաև որոշման հավելվածի 14-րդ կետից հանել «առևտրային գաղտնիքի» բառերը։
Այս փոփոխությունը նախատեսվում է «Առողջության համընդհանուր ապահովագրության մասին» օրենքի համապատասխան դրույթներին որոշումը համապատասխանեցնելու նպատակով։
Ի՞նչ արդյունք է ակնկալվում
Նախագծի ընդունման արդյունքում Հայաստանի Հանրապետության կառավարության 2026 թվականի հունվարի 8-ի N 25-Ն որոշումը կհամապատասխանեցվի «Առողջության համընդհանուր ապահովագրության մասին» օրենքի դրույթներին։
Ըստ հիմնավորման՝ նախագծի ընդունմամբ պետական բյուջեի եկամուտներում և ծախսերում էական ավելացում կամ նվազեցում չի նախատեսվում։
Նախագիծը մշակվել է Առողջության համընդհանուր ապահովագրության հիմնադրամի աշխատակիցների կողմից։
Նախագիծը բխում է առողջության համապարփակ ապահովագրության համակարգի ներդրմանն ուղղված կառավարության ծրագրային և ռազմավարական փաստաթղթերից։
Նախագծով սահմանվում է, որ որոշումն ուժի մեջ կմտնի պաշտոնական հրապարակմանը հաջորդող օրվանից։