Ռուսաստանի պաշտպանության նախարարի տեղակալ Վասիլի Օսմակովը և Ադրբեջանի պաշտպանության նախարար Զաքիր Հասանովը պայմանավորվել են շարունակել փորձի փոխանակումը մարտական պատրաստության կազմակերպման հարցում, հայտնել է Ռուսաստանի պաշտպանության նախարարությունը։
Նրանք քննարկել են երկկողմ ռազմական համագործակցության ներկա վիճակը և այն համապարփակ, միջնաժամկետ հիմքերի վրա դնելու հեռանկարները։
«Պայմանավորվածություններ են ձեռք բերվել շարունակելու փորձի փոխանակումը մարտական պատրաստության կազմակերպման, ինչպես նաև ռազմական կրթության և ռազմական գիտության ոլորտներում»,-ասվում է հաղորդագրության մեջ։
Օսմակովի գլխավորած ռազմական պատվիրակությունը սեպտեմբերի 29-30-ն այցելել է Ադրբեջան։ Պատվիրակությունը ներկա է գտնվել ADEX 2026 պաշտպանական միջազգային ցուցահանդեսի բացման արարողությանը և այցելել ռազմական արտադրանք ներկայացնող ռուսական տաղավար։ Օսմակովն ու Հասանովը բանակցություններ են վարել։
Ինչպես ընդգծվում է, բանակցություններն անցել են բարեկամական և կառուցողական մթնոլորտում, իսկ դրանց արդյունքները հաստատել են պաշտպանական ոլորտում համագործակցությունը խորացնելու փոխադարձ շահագրգռվածությունը՝ ի կատարումն Ռուսաստանի Դաշնության և Ադրբեջանի միջև 2022 թվականի փետրվարի 22-ին ստորագրված՝ դաշնակցային փոխգործակցության մասին հռչակագրի։