Արցախի Հանրապետութեան Ազգային ժողովի նախագահի պարտականութիւնները կատարող Գագիկ Բաղունց հետեւեալ ուղերձը յղեց 2020 թուականի սեպտեմբեր 27-ի պատերազմի 6-րդ տարելիցին առիթով.
«Վեց տարի առաջ` 2020 թուականի սեպտեմբերի 27-ին, Ազրպէյճանը, կոպտօրէն ոտնահարելով հակամարտութեան կարգաւորման հիմնարար` ուժի եւ դրա սպառնալիքի չկիրառման սկզբունքը եւ խնդիրը բացառապէս խաղաղ ճանապարհով հանգուցալուծելու միջազգային ստանձնած պարտաւորութիւնները, լայնածաւալ ու արիւնահեղ պատերազմ սանձազերծեց Արցախի ժողովրդի դէմ:
«44 օր շարունակ համայն հայութիւնը միասնական ճակատով պայքարեց սեփական պատմական հայրենիքում ապրելու եւ արարելու անօտարելի իրաւունքի երաշխաւորման համար: Մեր ժողովուրդը ցուցաբերեց աննկուն կամք ու հերոսական դիմադրութիւն: Այսօր մեր խորին խոնարհումն ու երախտագիտութիւնն ենք յայտնում հայրենիքի պաշտպանութեան համար իրենց կէանքը զոհաբերած բոլոր նահատակների պայծառ յիշատակին: Նրանց սխրանքն ու անձնազոհութիւնը յաւերժ դրոշմուած են մեր ազգի պատմութեան մէջ:
«2020 թուականի պատերազմն ու դրա ընթացքում Ազրպէյճանի կողմից իրականացուած բազմաթիւ ռազմական յանցագործութիւնները, քաղաքացիական բնակչութեան եւ ենթակառուցուածքների թիրախաւորումն այդպէս էլ չարժանացան միջազգային հանրութեան պատշաճ, սկզբունքային եւ իրաւական համարժէք գնահատականին: Հէնց այդ անպատժելիութիւնն ու միջազգային անտարբերութիւնը դարձան պարարտ հող հետագայ շրջափակման, նոր նախայարձակումի եւ ի վերջոյ` արցախահայութեան ամբողջական ցեղային զտման համար:
«Արցախի ժողովրդի բռնի տեղահանմամբ ու հայրենազրկմամբ, սակայն, Ազրպէյճանական յանցագործութիւնների շղթան չընդհատուեց: Այսօր էլ Ազրպէյճանը շարունակում է հետեւողականօրէն ջնջել հայկական հետքը բռնազաւթուած Արցախից. պետական մակարդակով աւերւում, պղծւում ու աղաւաղւում է մեր բազմադարեայ պատմամշակութային եւ հոգեւոր ժառանգութիւնը, հողին են հաւասարեցւում մեր տներն ու օճախները, պղծւում` գերեզմաններն ու սրբավայրերը:
«Այս իրողութիւնների պայմաններում Արցախի մշակութային ժառանգութեան պաշտպանութիւնը, Պաքուի բանտերում ապօրինաբար պահուող մեր հայրենակիցների անյապաղ ազատ արձակումն ու անյայտ կորածների ճակատագրերի պարզաբանումը պէտք է մնան համազգային օրակարգի անսակարկելի առաջնահերթութիւններ:
«Կրած ծանրագոյն զրկանքներով հանդերձ` Արցախի ժողովուրդը չի հրաժարուել եւ երբեք չի հրաժարուելու իր հաւաքական իրաւունքներից: Խաղաղութիւնը չի կարող կառուցուել արդարութեան շրջանցմամբ, իսկ ուժի կիրառման ու նախայարձակումի արդիւնքների օրինականացումը բացարձակապէս անընդունելի է: Տարածաշրջանում արդար եւ տեւական խաղաղութիւն հնարաւոր է մեր ժողովրդի հիմնարար իրաւունքների վերականգնման, ինչպէս նաեւ միջազգային յուսալի երաշխիքների ներքոյ դէպի սեփական պատմական հայրենիք արժանապատիւ, անվտանգ ու հաւաքական վերադարձի ապահովման ճանապարհով:
«Յաւե՛րժ փառք մեր նահատակներին:
«Ուժ եւ տոկունութիւն մեր ժողովրդին»: