Իրավաբան, գործարար Արմեն Սաքապետոյանը նոր հրապարակային դիմում է հասցեագրել լրատվամիջոցներին՝ տեղեկացնելով, որ երկար սպասումից հետո վերջապես ստացել է Կենտրոնական բանկի պաշտոնական պատասխանը՝ իր և իր ընտանիքի բանկային գաղտնիքի ենթադրյալ արտահոսքի վերաբերյալ դիմումին, սակայն այն գնահատում է «փաստացի անբովանդակ»։ Iravaban.net-ը ներկայացնում է նրա դիմումը։
Հիշեցնենք, որ նա նախկինում հրապարակային ահազանգ էր հնչեցրել բանկային գաղտնիք կազմող տեղեկությունների ենթադրյալ արտահոսքի մասին, իսկ օգոստոսի վերջին հայտնել էր, որ Կենտրոնական բանկը սահմանված ժամկետում չի պատասխանել իր՝ հուլիսի 23-ին ներկայացրած գրավոր դիմումին։
Ի՞նչ պատասխան է ստացել Կենտրոնական բանկից
Ըստ դիմողի՝ ստացված գրությունը փաստացի անբովանդակ է. նրա գնահատմամբ՝ կառույցը խուսափում է հստակ պատասխան տալուց և առաջարկում է դիմել այլ մարմինների։
Ի՞նչ քայլ է ձեռնարկել դրանից հետո
Դիմողի խոսքով՝ այս պայմաններում ինքը պաշտոնական դիմում է հղել ՀՀ Կենտրոնական բանկի նախագահին՝ պահանջելով անձնական հանդիպում կառույցի պատասխանատու անձի հետ՝ իր հարցերի պատասխանները տեղում ստանալու համար։
Ի՞նչ է հայտնում դատական գործընթացի մասին
Արմեն Սաքապետոյանը միաժամանակ տեղեկացնում է, որ ընդհանուր իրավասության դատարանը մերժել է իր հայցի վարույթ ընդունելը։ «Շարունակելու եմ հետևողականորեն պաշտպանել իրավունքներս բացառապես իրավական հարթությունում»,- նշում է նա։
Տեսանյութը և փաստաթղթերը
Գործի մանրամասները դիմողը ներկայացրել է տեսանյութով և կից ֆայլերով, որոնց հղումը տրամադրել է լրատվամիջոցներին՝ Google Drive։
Արմեն Սաքապետոյանը նշում է, որ պատրաստակամ է սիրով պատասխանել լրագրողների հարցերին։
Iravaban.net-ը պատրաստ է ներկայացնել նաև գործի մյուս կողմերի, այդ թվում՝ Կենտրոնական բանկի դիրքորոշումը։
Ծանուցում. սույն նյութում ներկայացված են դիմողի պնդումները և գնահատականները, որոնք իրավական գնահատական չեն ստացել։ Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով։