Պարսելոնայի աջ ծայրի յառաջապահ Լամին Եամալ Սպանիոյ «Լա լիկա»-ի 3-րդ հանգրուանի մրցումին ընթացքին դարձած է պատմական մրցանիշի հեղինակ:
Քաթալաններու խումբին 5-2 արդիւնքով յաղթանակի պահուն (Ռայօ Վայեքանոյի դէմ), երիտասարդ ֆութպոլիստը դարձած է տուպլէի հեղինակ` անցնելով 50 կոլերու սահմանը եւ հասնելով 52 կոլերու:
Եամալ դարձաւ սպանական արհեստավարժ ֆութպոլի պատմութեան ամէնէն երիտասարդ մարզիկը, որ 50 կոլերու սահմանը անցած է:
Ան 19 տարեկան եւ 49 օրական էր, երբ կտրեց այդ սահմանը` բարելաւելով Ռէալ Մատրիտի նախկին յառաջապահ Ռաուլ Կոնզալեսի մրցանիշը, որ 19 տարեկան եւ 249 օրական էր: Առաջին եռեակին մաս կը կազմէ Աթլեթիքօ Մատրիտի նախկին յառաջապահ Ֆեռնանտօ Թորես, որ 20 տարեկան եւ 221 օրական էր, երբ անցած է 50 կոլերու սահմանը:
Եամալ 2023-ի յուլիսէն ի վեր ելոյթ կ՛ունենայ քաթալաններու հիմնական խումբին հետ: Ան այս տարեշրջանին արդէն իսկ 3 մրցում կատարած է եւ նշանակած 2 կոլ:
Անցեալ տարեշրջանին ան 45 մրցում կատարած էր` նշանակելով 24 կոլ եւ կատարելով 14 էսիսթ: