Լիբանանի մէջ Միացեալ Նահանգներու դեսպան Միշէլ Իսա երէկ այցելեց տիւրզիներու հոգեւոր պետ շէյխ Սամի Ապի Մունային, որուն հետ հանդիպումէն ետք յայտնեց. «Լիբանանցիները համաձայն են, որ Հըզպալլան պէտք է զէնքը յանձնէ»:
«Կը կարծեմ, որ հանրապետութեան նախագահ Ժոզեֆ Աունի եւ Հըզպալլայի միջեւ ուղղակի կամ անուղղակի հաղորդակցութիւն գոյութիւն ունի», ըսաւ ան:
«Մենք տեւաբար Իսրայէլին կոչ կ՛ուղղենք դադրեցնելու եւ մեղմացնելու իր հարուածները, սակայն ատոր դիմաց Հըզպալլան որեւէ քայլ չի կատարեր», նշեց դեսպանը:
Միացեալ Նահանգներու դեսպանը նաեւ ըսաւ. «Հըզպալլան չ՛ուզեր լիբանանեան կառավարութեան, Միացեալ Նահանգներուն կամ Իսրայէլի հետ խօսիլ եւ իր հրամանը միայն Իրանէն կը ստանայ: Կ՛ուզենք, որ ան իր զէնքերը յանձնէ, եւ անկէ յաւելեալ բան չենք ուզեր»:
Պատասխանելով Ընկերվար յառաջդիմական կուսակցութեան ղեկավար Ուալիտ Ժոմպլաթի` շրջագծային համաձայնութեան նկատմամբ արտայայտած կեցուածքին մասին հարցումի մը, Իսա յայտնեց. «Ժոմպլաթը օր մը կ՛ուզէ, օր մը` ոչ: Մօտ օրէն անոր հետ կապուինք»:
Ժոմպլաթ Կ՛արձագանգէ
Ընկերվար յառաջդիմական կուսակցութեան ղեկավար Ուալիտ Ժոմպլաթ արձագանգեց Միացեալ Նահանգներու դեսպանին` նշելով. «Կը թուի, թէ դեսպան Իսան, իր բազմազան մշակութային ու քաղաքական գործունէութեան մէջ, չկարողացաւ կարդալ մեկնաբանութիւններս «Եռակողմ շրջագիծ» կոչուող փաստաթուղթին վերաբերեալ, զոր ես կը մերժեմ եւ որ պէտք է փոխարինուի Թաէֆի համաձայնագիրին եւ թիւ 1701 բանաձեւին մէջ նշուած զինադադարի համաձայնագիրով»: