Ժետտայի մէջ (Սէուտական Արաբիա) Ապտուլլահ թագաւորի անուան մարզադաշտին վրայ Ահլի 1-0 արդիւնքով յաղթեց Նոր Զելանտայի Օքլենտ Ֆ. Ք. խումբին եւ հասաւ միջցամաքամասային բաժակի քառորդ աւարտական:
Ահլի, որ շահած էր Ասիոյ «Չեմփիընզ լիկ»-ը, իր միակ կոլը նշանակեց 63-րդ վայրկեանին: Սալեհ Ապու Շամաթ նշանակեց մրցումին միակ կոլը` հիանալի փոխանցում մը ստանալէ ետք Հայաստանի հաւաքականի խմբապետ Էդուարդ Սպերցեանէն:
Այս ձեւով Սպերցեան իր պաշտօնական 4-րդ մրցումին մեծ դեր ունեցաւ Ահլիի յաջողութեան մէջ:
19 սեպտեմբերին Ահլի պիտի մրցի Հարաւային Ափրիկէի Մամելոտի Սանտաունզ խումբին դէմ, որ Ափրիկէի ախոյեանն է:
Այս մրցումին յաղթականը պիտի մրցի ամերիկեան ցամաքամասի ախոյեան Թոլուքային դէմ, որմէ ետք Եւրոպայի «Չեմփիընզ լիկ»-ի ախոյեան Փարիզ Սեն Ժերմեն պիտի ըլլայ աւարտական մրցումի մէկ կողմը` սպասելով միւս ցամաքամասերէն զտուած ակումբին:
Յուսանք, որ Սպերցեան կարենայ Ահլիի հետ հասնիլ աւարտական` մրցելու համար Փարիզ Սեն Ժերմենի դէմ: