Երկուորեակ եղբայրներ Նիքոլայ եւ Սեպասթիան Տէրտէրեաններ, արհեստավարժ բռնցքամարտի երեկոյի ընթացքին, յաջող ելոյթ ունեցան Քալիֆորնիոյ Սանթա Մոնիքա քաղաքին մէջ:
Արհեստավարժ ասպարէզին մէջ առաջին անգամ ըլլալով Տէրտէրեան եղբայրները մասնակցեցան նոյն մրցաշարքին:
Նիքոլայ Տէրտէրեան (4-0) պարտութեան մատնեց Քրիսթիան Փերես Էրնանտեսը (12-6): Մենամարտը առաջին ռաունտէն իսկ վերջ գտաւ, երբ Տէրտէրեան նաք-աութի ենթարկեց իր մրցակիցը:
Սեպասթիան (2-0) չորս ռաունտնոց մենամարտ կատարեց Խոսիաս Կոնզալեսի դէմ (2-8) եւ կէտերով յաղթեց իր մրցակիցին` իրաւարարներու (40-36) միաձայն որոշումով:
Տէրտէրեան եղբայրները կը մասնակցին Օսքար Տէ Լա Հոյայի «Կոլտըն Պոյ Փրոմոշընզ» ընկերութեան հետ:
Նախապէս Տէրտէրեանները ոչ արհեստավարժ բռնցքամարտիկի օրերուն կը ներկայացնէին Դանիոյ հաւաքականը: Նիքոլայ 2024-ի Փարիզի Ողիմպիական խաղերուն ալ մասնակցած է:
Արհեստավարժ ասպարէզի սկսելէ ետք երկու եղբայրներն ալ Հայաստանի դրօշին տակ կը ներկայանան մրցումներուն: Երկուքն ալ անյաղթ ասպարէզ ունին մինչեւ օրս, ուր Նիքոլայ 4 մրցումներն ալ յաղթած է, իսկ Սեպասթիան իր 2 մրցումներուն ալ անյաղթ է: