Հանրապետութեան նախագահ Ժոզեֆ Աուն երէկ Պաապտայի պալատին մէջ ընդունեց երեսփոխանական պատուիրակութիւն մը, որուն մաս կը կազմէին նաեւ Հայկական երեսփոխանական պլոքի ներկայացուցիչ Յակոբ Բագրատունի եւ պլոքի անդամ Յակոբ Թերզեան:
Երեսփոխան Խալաֆ հանդիպումէն ետք պատուիրակութեան անունով յայտարարեց, որ իրենք կառչած կը մնան ՖԻՆԻՒԼ-ի ուժերուն հարաւային Լիբանան մնալուն, որպէսզի այդտեղ որեւէ բաց չստեղծուի` նկատի ունենալով իսրայէլեան հեռացումը հաստատելու, անվտանգութիւնն ու կայունութիւնը պահպանելու եւ պետութեան գերիշխանութեան տարածման մէջ բանակին թիկունք կանգնելու դերակատարութիւնը:
Ան նշեց, որ ՖԻՆԻՒԼ-ի ուժերուն հարաւային Լիբանանի մէջ պահպանումը պահանջող դիմումը կը կրէ 86 երեսփոխաններու ստորագրութիւնը, եւ նախագահին այցելութեան մասնակցած են տարբեր ուղղուածութիւններէ եւ պլոքներէ 20 երեսփոխաններ:
Երեսփոխանը նշեց, որ հանրապետութեան նախագահը ընդգծած է նշեալ թղթածարին կարեւորութիւնը, եւ պատուիրակութիւնը դրած իր կատարած միջազգային աշխատանքներու ծիրին մէջ:
«ՖԻՆԻՒԼ-ի առաքելութեան երկարաձգումի ձախողելուն պարագային պէտք է Հարաւի մէջ որեւէ կարելի ձեւաչափով միջազգային ուժ պահպանել, Ապահովութեան խորհուրդի անդամներու եւ միջազգային ուժերուն մասնակցող երկիրներու գործողութիւններու համընթաց քայլերով» ՄԱԿ-ի դրօշին ներքեւ, յայտնած է նախագահ Աուն:
Միջազգային ուժերու մասնակցութեան շուրջ ուղղուած հարցումի մը պատասխանելով` նախագահը ըսած է. «Անկեղծօրէն մասնակցութեան պատրաստակամութիւն ունեցող պետութիւններու շուրջ կ՛իմանանք լրատուական միջոցներէն միայն, եւ ցարդ ոչ մէկ պաշտօնական խօսակցութիւն եղած է»:
Աւելի ուշ, նախագահական պալատը հաղորդեց, որ հանրապետութեան նախագահը ողջունած է ՖԻՆԻՒԼ-ի լիազօրութիւնը երկարաձգելու երեսփոխանական նախաձեռնութիւնն ու դիմումը` նշելով. «ՖԻՆԻՒԼ-ի Հարաւի մէջ ներկայութիւնը բազմաթիւ առումներով կարեւոր է եւ կը նպաստէ բնակիչներուն իրենց գիւղերուն ու գիւղաքաղաքներուն մէջ հաստատման, ինչպէս նաեւ լիբանանեան բանակին հետ գործակցաբար եւ համակարգումով կայունութեան ամրապնդման»:
«Մեր առաջին ընտրանքը ՖԻՆԻՒԼ-ի ուժերու լիազօրութեան երկարաձգումն է, եւ եթէ չերկարաձգուի, ապա երկրորդ ընտրանքը որդեգրելն է ձեւաչափ մը, որ կ՛երաշխաւորէ միջազգային ուժերու հարաւային Լիբանանի մէջ անհրաժեշտ իրաւական շրջագիծի մէջ ներկայութիւնը, եւ ուր այդ ուժերը կ՛ըլլան լիբանանեան բանակին կողքին եւ անոր հետ համակարգումով` կայունութեան եւ անոնց վրայ դրուած խնդիրներու իրականացման նպաստելու համար», ըսած է ան:
«Իսրայէլ կը մերժէ ՖԻՆԻՒԼ-ի ուժերուն ներկայութիւնը, եւ շուրջ մէկ տարիէ ի վեր այդ ուղղութեամբ ճնշում կը բանեցնէ, մինչ մենք անոնց մնալը կը պահանջենք: Հիմնական գաղափարը յառաջացնելն է բեկում մը, որ կ՛երաշխաւորէ հարաւային Լիբանանի մէջ միջազգային ներկայութիւնը, ըլլայ այդ ՖԻՆԻՒԼ-ի ուժերու երկարաձգումով կամ անոնց աջակցող միջազգային ուժերու միջոցով, այնպէս մը, որ պահպանուի կայունութիւնը եւ ամրապնդուի Լիբանանի պետութեան ու բանակին դերը», նշած է նախագահ Աուն:
Երեսփոխանական պատուիրակութիւնը նաեւ այցելեց վարչապետարան, ուր իր դիմումէն օրինակ մը յանձնեց վարչապետ Նաուաֆ Սալամին:
Վերջինս երեսփոխաններուն շնորհակալութիւն յայտնեց անոնց նախաձեռնութեան համար եւ վերահաստատեց. «Լիբանանեան պաշտօնական դիրքորոշումը կառչած կը մնայ կարիքին ներկայութեանը հարաւային Լիբանանի մէջ ՄԱԿ-ի ուժի մը, որ երեք հիմնական առաքելութիւն ունի` հսկողութիւն, զեկուցում, համակարգում եւ հաղորդակցութիւն»:
«ՄԱԿ-ի ընդհանուր քարտուղարին, անոր Պէյրութ այցելութեան եւ ատոր յաջորդած հաղորդակցութիւններուն ընթացքին փոխանցեցի այս առնչութեամբ Լիբանանի յստակ դիրքորոշումը, եւ ան հասկացողութիւն ցուցաբերեց հարաւային Լիբանանի մէջ ՖԻՆԻՒԼ-ին յաջորդող ՄԱԿ-ի ուժի մը ներկայութեան շարունակման կարիքին նկատմամբ, ինչ որ արտացոլացուց նաեւ այս առնչութեամբ անոր վերջին զեկուցումը:
Երեսփոխան Բագրատունի դիտել տուաւ, որ որեւէ ուժ կամ զինուորական հետազօտող պետութեան ընտրութեան պարագային պէտք է նկատի ունենալ անոր յարաբերութիւնը Իսրայէլի հետ եւ առաւելագոյն չափով պէտք է աշխատիլ չափաւոր կեցուածք ունեցող պետութիւններ ներառել: Առ այդ, կարելի չէ Ազրպէյճանի մասնակցութիւնը ընդունիլ` նկատի ունենալով անոր անմիջական զինուորական եւ քաղաքական խոր գործակցութիւնը Իսրայէլի հետ: Բագրատունի դիտել տուաւ, որ արդէն Թուրքիա մաս կը կազմէ ՄԱԿ-ի ուժերուն: