Իսրայէլի մէջ Միացեալ Նահանգներու դեսպան Մայք Հաքըպի նշեց, որ Միացեալ Նահանգներու նախագահ Տանըլտ Թրամփը միայն Իրանին օդային հարուածներ հասցնելու պատրաստ չէ, այլ նաեւ` անոր սնանկացման պատճառ դառնալու:
Ան նշեց, որ Միացեալ Նահանգներու եւ Իսրայէլի գործադրած գործողութիւնը Իրանին մեծ վնաս պատճառեց եւ իրանեան վարչակարգը դրաւ իշխանութեան ստանձնումէն ի վեր ամէնէն տկար դիրքի վրայ:
Հաքըպի ըսաւ, որ Թրամփ կը գիտակցի, թէ իրանեան վարչակարգը տնտեսապէս տկարացնելը կրնայ իրանցի ժողովուրդը մղել զայն տապալելու` յոյս յայտնելով, որ վարչակարգը կը տապալի, որովհետեւ ատիկա աշխարհը կը վերածէ «աւելի լաւ վայրի մը»:
Դեսպանը ըսաւ, որ Միացեալ Նահանգներու նախագահը աշխարհի տարածքին ամէնէն շատ թիրախաւորուած անձերէն մէկն է` Թուրքիոյ մէջ անոր օդանաւը փոխելու ծրագիրը որակելով «հանճարեղ ու կատարելապէս գործադրուած»:
Ան նշեց, որ Թրամփը թիրախաւորելու իրանեան սպառնալիքներ գոյութիւն ունին, եւ իսրայէլեան Մոսատը նպաստեց զինք թիրախաւորող սպառնալիքի լրջութեան հաստատման:
Հաքըպի շեշտեց, որ Թրամփ կը գիտակցի, թէ Իրան Միացեալ Նահանգներուն սպառնալիք կը ներկայացնէ, եւ Թեհրանը ամբաստանեց հազարաւոր ամերիկացիներու մահուան պատճառ դարձած յարձակումներու շղթայազերծման մէջ` աւելցնելով, որ իրանեան խնդիրը միայն Միջին Արեւելքով չի սահմանափակուիր, այլեւ ամբողջ աշխարհին կը հասնի:
Իսրայէլի մէջ Միացեալ Նահանգներու դեսպանը պնդեց, թէ Հըզպալլան ամերիկացիներ սպաննելու նպատակով Հարաւային Ամերիկայի 12 երկիրներու մէջ տարածուած է: