Ազգային ժողովում այսօր շարունակվում է 9-րդ գումարման առաջին նստաշրջանի աշխատանքը:
Ավարտվեց Պաշտպանության հանձնաժողովի նախագահի պաշտոնում առաջադրած ՔՊ-ական Վիլեն Գաբրիելյանիի թեկնածության քննարկումը: Այժմ «Քաղաքացիական պայմանագրից» պատգամավոր Արման Եղոյանը ներկայացնում է Արուսյակ Ջուլհակյանի թեկնածությունը Պետաիրավական հարցերի մշտական հանձնաժողովի նախագահի պաշտոնում:
Պետաիրավական հանձնաժողովի առաջիկա անելիքներից է լինելու նոր Սահմանադրության քննարկումները կազմակերպելը։ «Մենք պետք է ունենանք Սահմանադրություն, որի իրական հեղինակը ժողովուրդն է»,- ասաց պետաիրավական հանձնաժողովի նախագահի ՔՊ-ական թեկնածուն:
ԱԺ 12 հանձնաժողովներից 8-ի նախագահներին կառաջադրի իշխող «Քաղաքացիական պայմանագիր» խմբակցությունը, 3-ը՝ «Ուժեղ Հայաստան» խմբակցությունը, 1-ը՝ «Հայաստան» խմբակցությունը:
«Քաղաքացիական պայմանագիր» խմբակցությունը նախագահներ առաջադրելու համար ընտրեց Պաշտպանության և անվտանգության հարցերի, Պետաիրավական հարցերի, Արտաքին հարաբերությունների, Տնտեսական հարցերի, Կրթության, գիտության, մշակույթի, սպորտի և սփյուռքի հարցերի, Առողջապահության հարցերի, Աշխատանքի և բարեկեցության հարցերի և Տարածաշրջանային և եվրասիական ինտեգրման հարցերի հանձնաժողովները:
«Ուժեղ Հայաստան» խմբակցությունն ընտրեց Ֆինանսավարկային և բյուջետային հարցերի, Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի, Եվրոպական ինտեգրման հարցերի հանձնաժողովները:
«Հայաստան» խմբակցությունն ընտրեց Մարդու իրավունքների պաշտպանության և հանրային հարցերի հանձնաժողովը: