Սպանիոյ ներքին գործոց նախարարութիւնը յայտարարեց, թէ 24 ժամուան ընթացքին Մարոքէն 49 հազար ապօրինի գաղթականներ մուտք գործած են հարաւային Սպանիոյ Սապթա շրջան: Այս մասին հաղորդեց «Ռոյթըրզ» լրատու գործակալութիւնը:
ԱՖՓ լրատու գործակալութիւնը իր կարգին սպանական ոստիկանութենէն աղբիւր մը մէջբերելով հաղորդեց, թէ հինգշաբթիէն ուրբաթ գիշեր հազարաւոր գաղթականներ Մարոքի եւ Սապթայի միջեւ սահմանը անցած են:
«Իրողական թիւը հաշուել կարելի չեղաւ», նշած է աղբիւրը:
Ֆրանսայի ներքին գործոց նախարար Լորան Նունիեզ յայտարարեց. «Հազարաւոր ապօրինի գաղթականներու անցնող օրերու ընթացքին Մարոքի հետ սահմանային Սապթա շրջան հոսքէն ետք, Ֆրանսան Սպանիոյ հետ իր սահմանի վերահսկողութիւնը պիտի խստացնէ»:
«Սապթա շրջանին մէջ նկատուած կացութեան հարցով, երէկ երեկոյեան ցուցմունքներ տուի սպանական սահմաններուն վրայ խուզարկութեան գործողութիւնները անյապաղ ամրապնդելու», ըսաւ ան` նշելով, որ կապ հաստատած է իր սպանացի պաշտօնակիցին հետ:
ԱՖՓ հաղորդեց, թէ Ֆինլանտան յայտարարած է, թէ կը զօրակցի Սապթայի ճգնաժամին պատճառով Սպանիան Շենկենի շրջանէն հեռացնելու Իտալիոյ պահանջին:
Եւրոպական յանձնաժողովի նախագահ Ուրսուլա Ֆոն Տեր Լեյեն յայտնեց, որ գաղթականներու սպանական Սապթա հոսքի տեսարանը «անընդունելի է»` շեշտելով, որ վտանգաւոր անցումի գործողութիւնները պէտք է անմիջապէս դադրեցնել:
Սպանիոյ վարչապետ Փետրօ Սանչեզ յայտնեց. «Այն, ինչ որ երէկ Սապթայի մէջ տեղի ունեցաւ, ազգային գերիշխանութեան վրայ յարձակում է, եւ պետութեան բոլոր կարելիութիւնները պիտի օգտագործենք զայն պաշտպանելու համար»:
«Մարոքի հետ կը գործակցինք մաքսանենգման կազմակերպութիւններուն դէմ պայքարելու համար, եւ կը ցաւինք Սապթայի մէջ ճգնաժամին պատճառած մահերու թիւին համար», նշեց ան:
Վարչապետը յայտնեց, որ գաղթականներու հոսքը կապուած է մարդու առեւտուր կատարող յանցագործ կազմակերպութիւններու կողմէ վերջերս սպանական դատարանին ծովու ճամբով հասած գաղթականները վերադարձնելու վերաբերեալ հրապարակած վճիռին ապակողմնորոշող մեկնաբանութեան:
«Մարոքեան իշխանութիւններուն հետ մեր քննարկումներուն ընթացքին ի յայտ եկաւ, թէ մարդու առեւտուր կատարող յանցագործ խմբաւորումները տարածած են Սպանիոյ գերագոյն դատարանին կողմէ հրապարակուած վճիռի իրենց շահերուն ծառայող բացատրութիւն մը», ըսաւ ան` նշելով, որ դատարանի «ծովու ճամբով Սպանիա հասած անհատները սահման կարելի չէ վերադարձնել վճիռին բացատրութիւնը վերջին ժամերուն հսկայական արագութեամբ տարածուեցաւ»:
Սապթա շրջանի տեղական իշխանութիւնները կը հաղորդեն, որ Սապթա մուտք գործելու փորձի ընթացքին 34 գաղթականներ մահացած են:
Սպանիոյ ներքին գործոց նախարարութիւնը յայտնեց, թէ երէկ առտուընէ մինչեւ կէսօրէ ետք շուրջ 25 հազար գաղթական Մարոք վերադարձուցած է:
Միացեալ Նահանգներու նախագահ Տանըլտ Թրամփ «Ֆոքս Նիուզ»-ին յայտնեց. «Այն, ինչ որ Սպանիոյ մէջ տեղի կ՛ունենայ, սարսափազդու է, եւ մեզի նոյն բանը կրնայ պատահիլ, եթէ սխալ խումբը իշխանութիւնը ստանձնէ»: