Բանակը գալիս է օգնելու Քաղաքացիական գվարդիային
Իսպանիայի բանակի հարյուրավոր զինծառայողներ շտապ կարգով մեկնել են Սեուտա և միացել Ազգային գվարդիային:
Սեուտան պատկանում է Իսպանիային, թեպետ աշխարհագրորեն գտնվում է Աֆրիկայի հյուսիսում՝ Մարոկկոյի հարևանությամբ:
Տասնյակ հազարավոր ապօրինի ներգաղթյալներ՝ հիմնականում ծովով հասնում են Սեուտա, որի վարչակազմը Մադրիդին խնդրել է սատարել կարգ ու կանոնը վերականգնելու հարցում:
Այդ վտանգավոր ճանապարհին առնվազն 41 մարդ է զոհվել
Ըստ վարկածներից մեկի, այս խուճապն ու քաոսը սկսվել են այն բանից հետո, երբ Մարոկկոյում լուր է տարածվել, թե իսպանացիները, իբր, բացել են սահմանները և փախստականներին ներս են թողնում:
Վարչապետ Պեդրո Սանչեսը և ներքին գործերի նախարար Ֆերնանդո Գրանդե-Մարլասկան այսօր մեկնում են Սեուտա՝ իրավիճակի տեղում վերլուծելու համար:
Փախստականները՝ հիմնականում մարոկկացիներ, շարունակում են ժամանել: Շատերը փոքրիկ, ոչ հուսալի նավակներով են հասնում: Սահմանը հատելիս զոհվել է առնվազն 41 մարդ: Ենթադրվում է, որ դա վերջնական թիվը չէ:
Պատճառները հիմնականում սոցիալական են
Ինչն է նրանց դրդել այդ վտանգավոր ուղևորության: 25-ամյա փախստական Սալադը Թետուանից է: Նա սոցիալական պատճառների մասին է խոսում:
«Որովհետև մենք լավ կյանք չունենք Մարոկկոյում, լավ բժշկություն չկա, չունենք լավ դասատուներ, կյանքը վատն է Մարոկկոյում, դրա համար էլ լողալով այստեղ ենք գալիս»,- ասել է Սալադը:
Ապօրինի ներգաղթյալների մեծ մասը երիտասարդներ են, սակայն Սեուտա են հասնում նաև ընտանիքներ պստիկ երեխաներով:
Իսպանիայի քաղաքացիական գվարդիայի զինծառայողներն օգնում են նրանց դուրս գալ ջրից և ուղղորդում են դեպի վարչական շինություն, որտեղ գործում է ներգաղթյալներին ընդունող ժամանակավոր գրասենյակը:
¡Viva España!
Մարոկկացի իրավապահները Ֆնիդեք անվամբ ավանում, որը հենց Սեուտայի հարևանությամբ է, փորձել են ջրցաններով հետ մղել մարդկանց և թույլ չտալ նրանց մոտենալ Սեուտայի հետ սահմանին: Բայց տասնյակ հազարավոր ամբոխը զսպելու ճիգերն ապարդյուն էին:
Բախումներ են տեղի ունեցել հյուսիսաֆրիկյան տարածքում գտնվող և Իսպանիային պատկանող մեկ ուրիշ ինքնավար ավանի՝ Մելիլյայի մոտակայքում, որտեղ մարոկկացիները փորձել են ուժով ճեղքել Բենի-Անսարի անցակետը: Դա Աֆրիկայի հյուսիսում երկու երկրների սահմանին գտնվող միակ գործող անցակետն է:
Ջահելներից շատերը ոգևորված են, վանկարկում են. «¡Viva España!», «Կեցցե՛ Իսպանիան»:
«Ուզում եմ ինձ համար բացահայտել Եվրոպան»
Գործազուրկ մարոկկացի Ահմեդ Քարիմը խոսել է իր կյանքի երազանքի մասին. «Նախևառաջ ես ուզում եմ ինձ համար բացահայտել Եվրոպան, Մարոկկոյում մենք չունենք երկրից դուրս մեկնելու հնարավորություն: Դա, երևի, Մարոկկոյի առաջին խնդիրն է»:
Նրա փոխանցմամբ, շատերն են ուզում մեկնել Եվրոպա, Ամերիկա, սակայն հնարավորություն չունեն: Աշխատատեղերն էլ քիչ են:
Իտալիան էլ է մտահոգված
Մինչդեռ, Մարոկկոյի իշխանությունները հրաժարվում են խոսել այս ճգնաժամային իրավիճակի մասին: Ի դեպ, սա այլևս միայն Մարոկկոյի և Իսպանիայի խնդիրը չէ:
Իտալիայի վարչապետ Ջորջա Մելոնին սպառնացել է սառեցնել Շենգենի համաձայնությունն Իսպանիայի հետ, եթե այդ երկիրը չկարողանա կոշտ ու արդյունավետ միջոցներով կանխել ապօրինի ներգաղթյալների մուտքը Շենգենյան տարածք: