«Եու. Է. Էֆ. Ա.»-ի կազմակերպած «Քոնֆերենս լիկ»-ի զտումի առաջին հանգրուանի դարձի մրցումներուն, Հայաստանի ներկայացուցիչներ Փիւնիկ եւ Ալաշկերտ կրցան յաջողութեամբ հասնիլ Բ. հանգրուան:
Փիւնիկ, որ երթին Մալթայի մէջ կրցած էր 3-0 արդիւնքով հանգիստ յաղթանակ արձանագրել Մարսաշլոք խումբին դէմ կրցաւ իր յաղթանակը կրկնել եւ 1-0 արդիւնքով աւարտել մրցումը:
Մրցումի 10-րդ վայրկեանին քոնկոցի բերդապահ Քրսիթոֆըր Մաֆումպի մեծ քառակուսիէն դուրս գալով գետին բերած էր Փիւնիկի յառաջապահը, որ առանձին կը սուրար դէպի բերդ:
10 մարզիկներով Մարսաշլոք մեծ դժուարութիւն ունէր, բայց ձեւով մը դիմացաւ Փիւնիկի յարձակումներուն, որոնք մեծ մասամբ ձախողեցան, շատ անգամ մարզիկներու անձնասիրութեան պատճառով, շատ անգամ ալ անբախտ ըլլալով:
80-րդ վայրկեանին ռուս միջնապահ Տանիլ Քուլիքով փենալթիով նշանակեց Փիւնիկի միակ կոլը:
Օրուան միւս մրցումին, Ալաշկերտ մեկնած էր Ղազախստան` մրցելու Ելիմայ Սեմէյ խումբին դէմ:
Երթին հակառակ լաւ խաղալուն, Ալաշկերտ միայն 1-1 արդիւնքով հաւասարութիւն արձանագրած էր Երեւանի մէջ:
Մրցումը լաւ սկսաւ Ալաշկերտի համար, որուն կինեցի յառաջապահ Մոմօ Թուրէ 4-րդ վայրկեանին բացաւ մրցումին հաշիւը:
Ալաշկերտ շատ աւելի լաւ էր եւ առիթներ կը ստեղծէր, սակայն Աքմալ Պախթիարով 11-րդ վայրկեանին նշանակեց Ելիմէյի հաւասարութեան կոլը:
Արդիւնքը մնաց անփոփոխ, հակառակ Ալաշկերտի տիրապետելուն, եւ դիմուեցաւ երկարաձգման: Պզտիկ սխալ մը, եւ Խրվոյէ Իլիչ փենալթիով նշանակեց Ելիմէյի 2-րդ կոլը, 96-րդ վայրկեանին:
Հակառակ փոփոխութիւններուն եւ արդիւնքին, Ալաշկերտ այդքան ալ լաւ չխաղցաւ երկարաձգման ընթացքին, բայց 121-րդ վայրկեանին կրցաւ շատ կարեւոր կոլ մը նշանակել շնորհիւ պրազիլցի յետսապահ Հիկոր Կապրիէլի: Մրցակից խումբը յուսախաբ եղաւ այս կոլէն, մանաւանդ որ բոլոր մարզիկներով կը պաշտպանուէր:
Վահէ Գէորգեանի տղաքը փենալթիներով կրցան յաղթել 6-5 արդիւնքով, երբ Արսէն Բեգլարեան զսպեց քոլոմպիացի Փալասիոյի փենալթին` յաղթանակը նուիրելով Ալաշկերտի:
Նշենք, որ Փիւնիկի եւ Ալաշկերտի կողքին Նոա պիտի միանայ հայկական զոյգ խումբերուն, Բ. հանգրուանին: