Վրաստանի իշխանությունները կշարունակեն համագործակցել ԵԱՀԿ խորհրդարանական վեհաժողովի (ԽՎ) հետ, չնայած դրա բանաձևին, որը ստիպեց վրացական պատվիրակությանը լքել նիստը: Այս մասին հայտարարել է Վրաստանի վարչապետ Իրակլի Կոբախիձեն:
«Համագործակցությունը կշարունակվի, սակայն այդ համագործակցության որակը կախված կլինի նրանից, թե ինչպես է ԵԱՀԿ ԽՎ-ն շարունակելու իր գործունեությունը. կմնա՞ կոնգրեսական Ջո Ուիլսոնի մակարդակում, թե՞ կբարձրանա Ջո Ուիլսոնի մակարդակից բարձր», – ասել է Կոբախիձեն ճեպազրույցի ժամանակ։
Նրա խոսքով՝ սա կլինի հիմնարար հարց վրացական պատվիրակության և ԵԱՀԿ ԽՎ-ի միջև հետագա համագործակցության համար։
Հուլիսի 8-ին ԵԱՀԿ ԽՎ-ն ընդունեց Վրաստանի վերաբերյալ հռչակագիր։ Փաստաթղթում ներառված էր ԱՄՆ կոնգրեսական Ջո Ուիլսոնի կողմից մշակված բանաձև, որում, ի թիվս այլ բաների, նշվում էր, որ Վրաստանի 2024 թվականի խորհրդարանական և 2025 թվականի տեղական ինքնակառավարման մարմինների ընտրությունները խնդրահարույց էին և չէին արտացոլում ժողովրդի կամքը։ Ավելին, փաստաթղթում կրկին քննադատվում էր Վրաստանը ենթադրյալ ժողովրդավարական խնդիրների և հավաքների ազատության սահմանափակումների համար։ Վրացական պատվիրակությունը քվեարկությունից առաջ ի նշան բողոքի դուրս եկավ նիստերի դահլիճից։