Միացեալ Նահանգներու նախագահ Տանըլտ Թրամփ նշեց. «Ես Իրանի կողմէ թիրախաւորուածներուն թիւ մէկն եմ, որեւէ այլ անձէ առաջ»:
«Իրան 3 նաւեր թիրախաւորեց եւ ոչ թէ երկու: Որեւէ ապագայ յարձակումի շատ աւելի հզօր կերպով պիտի հակադարձենք», շեշտեց Սպիտակ տան ղեկավարը:
«Իրանին չափազանց կարծր հարուած հասցուցինք, եւ ամէն անգամ, որ մեր վրայ յարձակում շղթայազերծեն, մեր հակադարձութիւնը միշտ քսանապատիկը պիտի ըլլայ», ըսաւ ան:
«Անցեալ գիշերուան մեր հարուածները վճռական էին, եւ այսօր տեղի ունեցած յարձակումները պարզապէս վրէժխնդրական հակազդեցութիւն են», աւելցուց Թրամփ:
«Քիչ առաջ հեռաձայն ստացանք, եւ Իրան շատ կը ջանայ մեզի հետ կարգաւորման գործարք կնքել», նշեց Միացեալ Նահանգներու նախագահը` աւելցնելով. «Գործարք կնքելու մէջ Իրանի լրջութեան կը կասկածիմ եւ վստահութիւն չունիմ, որ ապագային որեւէ գործարք պիտի յարգեն»:
«Մեր նպատակը պատերազմը չէ, այլ իրանեան հիւլէական զէնքի ամբողջական զինաթափումն ու Թեհրանին հիւլէական զէնքեր ձեռք բերելը արգիլելը», ըսաւ ան:
«Իրանին հիւլէական զէնք ձեռք բերել արգիլելը պէտք է բոլորին զօրակցութիւնը վայելէ», աւելցուց Թրամփ:
«Ամերիկեան հարուածը Թեհրանի կողմէ նաւերու ռմբակոծման հակադարձութիւն է, եւ եթէ անիկա կրկնուի, կացութիւնը շատ աւելի վատ պիտի ըլլայ», շեշտեց Թրամփ:
Ամերիկացի պաշտօնատար մը «Էյ.Պի.Սի.» պատկերասփիւռի կայանին յայտնեց, որ չորեքշաբթի գիշերուան հարուածները մէկ օր առաջ աւելի քան 80 դիրքեր թիրախաւորած հարուածներէն աւելի լայնածաւալ էին:
Ամերիկեան բանակի կեդրոնի հրամանատարութիւնը յայտարարեց. «Յարձակում գործեցինք իրանեան զինուորական շուրջ 90 թիրախներու վրայ, որոնք ներառեցին հակաօդային պաշտպանութեան համակարգեր եւ ծովեզերքի հսկողութեան վայրեր: Թիրախաւորեցինք հրթիռներու եւ անօդաչու թռչող սարքերու պահեստաւորման դիրքեր եւ իրանեան ծովեզերքի երկայնքին ծովային կարողութիւններ ու զինուորական ծառայութիւններու ենթակառոյցներ:
Ամերիկացի պաշտօնատարներ «Աքսիոս»-ին յայտնեցին. «Նոր արշաւի տեւողութիւնն ու զօրութիւնը ամբողջովին կախեալ է Թեհրանի որդեգրելիք յառաջիկայ քայլերէն: Յարձակումներու շարունակութիւնը կախեալ է այն բանէն, թէ Իրան պիտի շարունակէ՞ Հորմուզի նեղուցին մէջ առեւտրական նաւերու վրայ իր յարձակումները: Իրանցիները քիչ մը պիտի ապտակենք, որպէսզի գիտնան, թէ կատակ չենք ըներ»:
Իրանի Յեղափոխական պահակագունդը յայտարարեց, թէ Քուէյթի եւ Պահրէյնի մէջ զինուորական ռազմակայաններ թիրախաւորած է:
Իրանի Խուզիստանի փոխնահանգապետը իրանեան լրատուամիջոցներուն յայտնեց, որ Ահուազ շրջանի մերձակայքը գտնուող դիրքերուն վրայ ամերիկեան յարձակումին հետեւանքով 3 զոհ եւ շարք մը վիրաւորներ արձանագրուած են:
Իրանի առողջապահութեան նախարարութիւնը յայտարարեց. «Երէկ եւ այսօր ամերիկեան յարձակումները թիրախաւորեցին հինգ նահանգներ եւ պատճառ դարձան 14 զոհերու եւ 78 վիրաւորներու արձանագրման»:
Իրանի Յեղափոխական պահակագունդը նշեց, որ ամերիկեան ուժերը «Քրուզ» հրթիռով երկրի հիւսիսը գտնուող Կիւլիստան նահանգի Աքքալա քաղաքի կամուրջին վրայ դիրքեր թիրախաւորած են:
Իրանեան «Ֆարս» լրատու գործակալութիւնը հաղորդեց, որ Միացեալ Նահանգներու հարուածած կամուրջը երկիրը Ռուսիոյ եւ Չինաստանին կապող փոխադրամիջոցային միջանցքին մաս կը կազմէ: Այդ ճամբով Ռուսիայէն բեռներ կը մատակարարուէին Իրան:
Ամերիկացի պաշտօնատար մը «Աքսիոս»-ին յայտնեց, թէ ամերիկեան օդուժը Իրանի մէջ գնացքի երկու կամուրջներ ռմբակոծած է:
Իրանեան «Ալամ» պատկերասփիւռի կայանը տեղական իշխանութիւններու ներկայացուցիչին յղում կատարելով հաղորդեց, որ ամերիկեան ուժերը երէկ կէսօրէ ետք հարուածներ հասցուցած են Իրանի այն շրջաններուն, որոնք «Պուշեհր» հիւլէական կայանին մօտ են:
Յարձակումի ենթարկուած են Պուշեհր նահանգի քանի մը կառոյցներ, ներառեալ նոյնանուն հիւլէական կայանի շրջակայքը:
Ղալիպաֆ. «Յստակօրէն Կ՛ըսեմ` Եթէ Հարուածէք, Հարուածներ Պիտի Ստանաք»
Իրանի խորհրդարանի նախագահ Մոհամետ Պաղեր Ղալիպաֆ յայտնեց. «Հորմուզի նեղուցը միայն իրանեան դասաւորումներով պիտի բացուի, եւ ոչ թէ` ամերիկեան սպառնալիքներով»:
«Ամերիկան տակաւին չսորվեցաւ, թէ խուլիկանութիւնն ու խոստմնադրժութիւնը առանց գինի պիտի չըլլան, եւ յստակ կերպով պիտի ըսեմ` եթէ հարուածէք, հարուածներ պիտի ստանաք»:
Իրանցի դիւանագէտ մը «Ուոլ Սթրիթ Ճըռնըլ»-ին յայտնեց, որ Միացեալ Նահանգներ Թեհրանի հետ առանց համակարգումի նաւարկման միջանցք ստեղծելով խաղաղութեան համաձայնութիւնը խախտեց:
«Միացեալ Նահանգներու համաձայնութիւնը խախտելը կ՛արդարացնէ նաւարկման շարժումին վրայ կրակ բանալու Իրանի որոշումը», նշեց դիւանագէտը:
Իրանի արտաքին գործոց նախարար Ապպաս Արաղչի յայտարարեց, որ Թեհրանը Միացեալ Նահանգներու հետ վերջնական համաձայնագիրի շուրջ բանակցութիւններ պիտի չսկսի, քանի տակաւին Ուաշինկթընը կը շարունակէ Իրանին սպառնալ:
Ան նաեւ զգուշացուց, որ Միացեալ Նահանգներու որեւէ նոր զինուորական հարուած նախկինէն աւելի լայնածաւալ պատասխան պիտի ստանայ: