Ռուսիան հետագային եւս հետամուտ պիտի ըլլայ Անդրկովկասի անվտանգութեան եւ կայունութեան վերաբերեալ միջազգային քննարկումները Ժընեւէն այլ բանակցային հարթակ տեղափոխելուն: Այս մասին ԹԱՍՍ լրատու գործակալութեան յայտարարած է Ռուսիոյ արտաքին գործոց փոխնախարար Միխայիլ Կալուզին:
«Զուիցերիան հակառուսական պատժամիջոցներուն միանալէն ետք այլեւս չէզոք կողմ չի նկատուիր», ըսած է Ռուսիոյ արտաքին գործոց փոխնախարարը:
Ան նշած է, որ Ժընեւի մէջ բանակցութիւններ կատարելու լրացուցիչ խոչընդոտ է Մոսկուայի եւ զուիցերիական քաղաքին միջեւ ուղիղ օդային հաղորդակցութեան բացակայութիւնը, ինչ որ կը դժուարացնէ պատուիրակութիւններու աշխատանքը:
Անդրկովկասի անվտանգութեան եւ կայունութեան վերաբերեալ միջազգային քննարկումները Ժընեւի մէջ կ՛ընթանան 2008 թուականէն: Այդ քննարկումներուն կը մասնակցին Աբխազիոյ, Վրաստանի, Ռուսիոյ, Միացեալ Նահանգներու եւ Հարաւային Օսեթիոյ ներկայացուցիչները` ՄԱԿ-ի, Եւրոպական Միութեան եւ ԵԱՀԿ-ի յատուկ ներկայացուցիչներու միջնորդութեամբ: