2026-ի Մոնտիալի լաւագոյն խումբերէն Ֆրանսա հանգիստ յաղթանակ մը արձանագրեց Շուէտի դէմ մրցումին եւ հասաւ Գ. հանգրուան, ուր պիտի մրցի Փարակուէյի դէմ:
Մրցումին սկիզբէն զգալի էր Ֆրանսայի առաւելութիւնը, ուր անգամ մը եւս Պրատլի Պարքոլա նկատի առնուած էր Տեզիրէ Տուէի փոխարէն, մինչ Օլիսէ-Էմպափէ զոյգը շարունակեցին փայլիլ:
Կիսախաղէն առաջ Էմպափէ անզսպելի հարուածով նշանակեց Ֆրանսայի առաջին կոլը, որ ուշացաւ հակառակ երկու անգամ Շուէտի բերդին սիւները ցնցուելուն, մինչ Էմպափէ կոլ նշանակած էր, բայց օֆ-սայտի պատճառով չէր վաւերացուած:
Էմպափէի կոլէն ետք Անթոնի Էլանկայի փոխանցումը չհասաւ իր խմբակիցին, բայց իրարանցումէ մը ետք Էլիոթ Սթրոուտ հաւասարութեան առիթ մը կորսնցուց ի նպաստ Շուէտի:
Բ. կիսախաղին, Պայերն Միւնիխի աստղերէն Մայքըլ Օլիսէ գեղեցիկ փոխանցում մը կատարեց Պարքոլային, որ նշանակեց Ֆրանսայի երկրորդ կոլը: Աւելի ուշ շուէտացի բերդապահ Եաքոպ Վիտել Զեթերշթրոմ լաւ ձեւով զսպեց Օլիսէի հարուածը:
Աւելի ուշ Զեթերշթրոմ անգամ մը եւս հերոսացաւ` զսպելով Օլիսէի այլ առիթը: 74-րդ վայրկեանին Օլիսէ լաւ գնդակ մը պատրաստեց Էմպափէի, որ անսխալ էր բերդին առջեւ` նշանակելով իր 2-րդ եւ Ֆրանսայի 3-րդ կոլը:
Այս կոլով Էմպափէ եղաւ Մոնտիալներու պատմութեան առաջին մարզիկը, որ նաք-աութի հանգրուաններու առաւելագոյն կոլերը նշանակած է:
Էմպափէի այս կոլը 9-րդն էր` գերազանցելով պրազիլցիներ Լէոնիտասի եւ Ռոնալտոյի 8 կոլերու մրցանիշը:
Էմպափէ նաեւ Մոնտիալի պատմութեան իր 17-րդ կոլը նշանակեց` 1 կոլով ետ մնալով Լիոնել Մեսսիէն եւ մէկ կոլով գերազանցելով Միրոսլաւ Քլոզէն:
Էմպափէ 18 մրցումներու ընթացքին նշանակած է 18 կոլ, մինչ Մեսսի 19 կոլ նշանակած էր 29 մրցումներու ընթացքին:
Նորվեկիա 2-1 արդիւնքով պարտութեան մատնեց Փղոսկրեայ Ափունքը: Մանչեսթըր Սիթիի յառաջապահ Էրլինկ Հաալանտ եղաւ Մոնտիալի պատմութեան երրորդ ֆութպոլիստը, որ իր առաջին Մոնտիալի երեք մրցումներուն 5 կամ աւելի կոլեր կը նշանակէ` Հերի Քէյնի եւ Միրոսլաւ Քլոզէի կողքին:
39-րդ վայրկեանին Անթոնիօ Նուսա բացաւ մրցումին հաշիւը: Բ. կիսախաղին Փղոսկրեայ Ափունք աւելի վտանգաւոր էր, եւ Մանչեսթըր Եունայթըտի յառաջապահ Ամար Տիալօ կրցաւ արդիւնքը հաւասարեցնել 74-րդ վայրկեանին:
Փաթրիք Պերկի փոխանցումէն ետք Հաալանտ նշանակեց Նորվեկիոյ յաղթանակի կոլը: Գ. հանգրուանին Նորվեկիա պիտի մրցի Պրազիլի դէմ, կիրակի օր:
Երէկ առաւօտեան ժամերուն Մեքսիքա 2-0 արդիւնքով յաղթելէ ետք Էքուատորին, հասաւ Գ. հանգրուան: Քինոնես եւ Խիմենես նշանակեցին առաջին կիսախաղին, մինչ Էքուատոր բաւական ճնշեց Բ. կիսախաղին, բայց արդիւնքը մնաց անփոփոխ: