Հանրապետութեան նախագահ Ժոզեֆ Աուն յայտնեց, թէ Ուաշինկթընի մէջ ստորագրուած շրջագծային համաձայնութիւնը կը ներառէ յօդուածներ, որոնք կը վերաբերին իսրայէլեան հեռացումին, տեղահանուածներուն ու գերիներուն, մինչեւ իսկ լիբանանցիներու Իսրայէլ գտնուող դիակներուն վերադարձին` նշելով, որ ասիկա համաձայնագիր մը չէ, այլ շրջագիծ:
Ան նշեց, որ Լիբանանի հարցը Իսրայէլի հետ է, ան գերիշխան պետութիւն է, ինքն իր համար բանակցելու որոշում տուաւ, եւ շրջագծային համաձայնութեան մէջ իր արդարադատական, քաղաքական եւ մարտական սկզբունքներէն չզիջեցաւ, ինչպէս ոմանք կ՛ըսեն:
Հանրապետութեան նախագահը բարձր գնահատեց խորհրդարանի նախագահ Նեպիհ Պըրրիի սադրանքը կանխարգիլելու դիրքը: «Պըրրին երկու հիմնական կարմիր գիծեր քաշեց` սադրանքն ու բանակը խաթարելը արգիլուած նկատելով, եւ մենք բոլորս այս երկու հարցերուն համաձայն ենք», ըսաւ ան:
Նախագահ Աուն բանակցութիւններուն եւ շրջագծային համաձայնութեան ընդդիմացողներուն կոչ ուղղեց` այլընտրանք ներկայացնելու կամ իրենց տեսակէտները յայտնելու կառոյցներուն մէջ` վերահաստատելով, որ տարակարծութիւնը սրբազան իրաւունք է, «ուստի քաղաքական քննարկում կատարենք, սակայն վէճը արգիլուած է: Թող ոչ ոք փողոց դիմէ եւ ճշմարտութիւնը աղաւաղէ իր համակիր զանգուածը համոզելու, թէ այն, ինչ որ տեղի ունեցաւ, անձնատուութիւն եւ նուաստացում է»:
Հանրապետութեան նախագահը հերքեց բանակի հրամանատար զօր. Ռուտոլֆ Հայքալը կամ Ընդհանուր ապահովութեան ընդհանուր տնօրէնէն բացի մնացեալ ապահովական մարմիններու ղեկավարները պաշտօնազրկելու մտադրութեան մասին տարաձայնութիւնները:
Ան բարձր գնահատեց անոնց դերակատարութիւնն ու թափած ջանքերը` շեշտելով, որ այդպիսի տարաձայնութիւններուն նպատակը բանակն ու ապահովական ուժերը հարուածելն է, եւ ոչ թէ անոնց դերին եւ ներկայութեան ամրապնդումը: