Երէկ կէսօրէ ետք Միացեալ Նահանգներու արտաքին գործոց նախարարութեան մէջ ընթացք առաւ Լիբանանի եւ Իսրայէլի միջեւ ամերիկեան հովանաւորութեամբ բանակցութիւններու 5-րդ փուլը, որ կ՛երկարի երեք օրերու վրայ:
Երէկ տեղի ունեցան քաղաքական եւ զինուորական միացեալ բանակցութիւններ` դեսպան Սիմոն Քարամի նախագահութեամբ լիբանանեան զինուորական եւ քաղաքական պատուիրակութեամբ:
Այսօր Փենթակոնի մէջ դարձեալ ամերիկեան հովանաւորութեամբ պիտի կատարուին զինուորական պատուիրակութիւններուն միջեւ բանակցութիւններ, իսկ վերջին նիստը պիտի գումարուի երրորդ օրը` դարձեալ Միացեալ Նահանգներու արտաքին գործոց նախարարութեան մէջ:
«Ժատիտ» պատկերասփիւռի կայանը բանակցութիւններու մեկնարկէն առաջ հաղորդեց. «Լիբանանի եւ Իսրայէլի միջեւ քաղաքական բանակցութիւններու ընթացքին պիտի քննարկուի իսրայէլացի օդաչու Ռոն Արատի աճիւնները լիբանանցի գերիներու հետ փոխանակելու թղթածրարը»: Արատ 16 հոկտեմբեր 1986-էն ի վեր անհետ կորսուած է: Անոր օդանաւը վար առնուած էր պաղեստինցի զինեալներու վրայ յարձակում կատարելու ընթացքին:
Իսրայէլի արտաքին գործոց նախարար Կիտէոն Սահեր յայտնեց. «Ուաշինկթընի մէջ Իսրայէլի եւ Լիբանանի բանակցութիւնները կարեւոր են, եւ Հըզպալլայի զինաթափումը մեր փոխադարձ շահերուն համահունչ է»:
Իսրայէլեան աղբիւր մը իսրայէլեան «Հաարեց» օրաթերթին յայտնեց. «Թել Աւիւ հետաքրքրուած է Ուաշինկթընի բանակցութիւններուն ընթացքին լուծումներ գտնելով, որոնք Լիբանանի զարգացումներէն իրանեան միջամտութիւնը կը հեռացնեն»:
«Մեր պատուիրակութիւնը լիբանանեան բանակի տեղակայման դիմաց հարաւային Լիբանանի որոշ մասերէ աստիճանական հեռացման ծրագիր պիտի առաջարկէ», ըսաւ աղբիւրը: