Սպիտակ տան բանբեր Քարոլայն Լեւիթ «Ֆոքս Նիուզ»-ին յայտնեց. «Միացեալ Նահանգներու նախագահ Տանըլտ Թրամփը պիտի չստորագրէ որեւէ համաձայնութիւն, որ երկրին ու անոր ազգային անվտանգութեան չի ծառայեր»:
«Փոխըմբռնման յուշագիրի ստորագրումէն ետք քարիւղի գիները նուազեցան եւ պատերազմէն առաջուան մակարդակին պիտի վերադառնան», նշեց Լեւիթ:
Իրանի նախագահ Մեսուտ Փեզեշքիան յայտնեց, որ Միացեալ Նահանգներու հետ բանակցութիւններու ազդուութիւնը կախեալ է համաձայնեցուած խոստումներու նկատմամբ ամբողջական յանձնառութենէն եւ զանոնք ճշգրիտ կերպով գործադրելէն:
Փեզեշքիան նշեց, որ համաձայնեցուած բնագիրէն շեղող յայտարարութիւնները չեն նպաստեր բանակցութիւններու յառաջ մղման:
Ան աւելցուց, որ բանակցային հոլովոյթին յառաջընթացը պիտի չափուի ընդունուած պատասխանատուութեան գործնական յանձնառութեան ճամբով:
Փեզեշքիան նշեց. «Ամերիկայի հետ փոխըմբռնման յուշագիրի յօդուածներուն միջազգային օրէնքի եւ մեր ժողովուրդի իրաւունքներու շրջագիծին մէջ ամբողջական գործադրութեան կը ձգտինք»:
«Շրջանին մէջ շարք մը խնդիրներ պիտի նահանջեն, եւ զաւթողները պիտի զսպուին, եթէ փոխըմբռնման յուշագիրի բոլոր յօդուածները գործադրուին», ըսաւ Փեզեշքիան:
Իսրայէլեան «Ճերուզալեմ Փոսթ» օրաթերթը նշեց. «Զուիցերիոյ բանակցութիւնները Իրանը աւելի հզօր եւ Իսրայէլը խոցելի կը դարձնեն»: