Հըզպալլայի գործողութիւններու կեդրոնը շաբաթ օր հաղորդագրութիւն մը հրապարակելով յայտնեց. «Իսրայէլացի թշնամին անգամ մը եւս կը պատրուակէ սուտ պնդումներ` արդարացնելու համար խախտելը զինադադարին, որ ոչ իսկ օր մը յարգեց, ներառեալ այն խախտումները, որոնք երէկ գիշերուընէ մինչեւ այսօր կը կատարէ»:
«Իսլամական դիմադրութիւնը կ՛ընդգծէ, որ երէկ` ուրբաթ, 19 յունիս 2026-էն ի վեր զինադադարը յարգեց, նոյնիսկ հակառակ թշնամիին առաջին պահէն խախտելուն, սակայն իր մատը բլթակին վրայ պահեց` նկատի ունենալու թշնամիին տեւական խոստմնադրժութիւնն ու դաւադրութիւնը», աւելցուց կեդրոնը:
Հըզպալլա յայտնեց, որ Իսրայէլ փորձած է Ալի Թահեր բարձունքին ուղղութեամբ ներթափանցել, սակայն հակառակ իրերայաջորդ փուլերուն ձախողած է եւ շարք մը զոհեր ու վիրաւորներ ունեցած, որմէ ետք ձեռնարկած է շրջանէն ներս թէ դուրս օդային բուռն ռմբակոծումներու` թիրախաւորելով ապահով քաղաքայինները:
«Իսլամական դիմադրութիւնը կը յայտարարէ, թէ զինադադարին իր յանձնառութեան կողքին պիտի չտատամսի թշնամիին հողեր խլելու եւ իր բռնագրաւումը ընդլայնելու որեւէ փորձի դէմ դնել: Մեր մարտիկները ամբողջովին պատրաստ պիտի ըլլան դէմ դնելու թշնամիին` քարպալայական պաշտպանութիւն ցուցաբերելով իրենց հողերուն, ժողովուրդին եւ հայրենիքին, ինչպէս նաեւ հաւատարիմ մնալով Աստուծոյ եւ իրենց սիրելի ժողովուրդին խոստումին, ի գին ամէն զոհողութիւններու», շեշտեց Հըզպալլա: