ՀՀ էկոնոմիկայի նախարար Գեւորգ Պապոյանն ԱԺ ֆինանսավարկային եւ բյուջետային հարցերի ու արտաքին հարաբերությունների, տարածաշրջանային եւ եվրասիական ինտեգրման ու եվրոպական ինտեգրման հարցերի մշտական հանձնաժողովների համատեղ նիստում ներկայացրել է 2025 թվականի ընթացքում ԵԱՏՄ եւ եվրոպական ուղղությամբ տնտեսական զարգացումները: Քննարկվել է «ՀՀ 2025 թվականի պետական բյուջեի կատարման մասին» տարեկան հաշվետվությունը:
«Հայաստանի տնտեսական զարգացման միտումները նախորդ տարվա ընթացքում շարունակել են մնալ բարձր: Հայաստանն աշխարհի միջին տնտեսական աճից 2,1 անգամ ավելի արագ է աճել, եւ ավելի քան 4 անգամ ԵԱՏՄ աճից է ավելի արագ աճել: Հայաստանը 2 անգամ արագ է աճել նաեւ զարգացող երկրների համեմատությամբ, եւ մեր աճը նախորդ տարի կազմել է 7,1 տոկոս»,- ասել է նախարարը:
Նա նշել է, որ դեռեւս 5 տարի առաջ ծրագրված 7 տոկոսի փոխարեն արձանագրվել է 7,9 տոկոս տնտեսական աճ:
Գեւորգ Պապոյանը մանրամասն խոսել է աշխատատեղերի բացման, քաղաքացիներին աշխատանքով ապահովելու եւ աշխատանքի արտադրողականության բարձրացմանն ուղղված ծրագրերի մասին:
Նախարարի գնահատմամբ ՀՀ տնտեսությունը վերջին տարիներին էական որակական փոփոխությունների է ենթարկվել, ինչը հնարավորություն է տալիս մրցունակ ապրանքներ արտահանել տարբեր երկրներ: Ըստ նրա՝ ԵԱՏՄ ստանդարտները նույնպես շատ բարձր են, դրանք ԵՄ ստանդարտներ են, երբեմն՝ ավելի բարձր: «Այդ ստանդարտներին մենք համապատասխանում ենք»,- ընդգծել է նախարարը՝ հավելելով, որ դեռեւս կան որոշ արտադրողներ, որոնք խնդիրներ կունենան ե՛ւ ԵԱՏՄ ե՛ւ ԵՄ շուկաներում:
«Այլեւս անցել են ժամանակները, երբ ասում են, որ հայկական արտադրանքը մրցունակ չէ Եվրոպայում՝ որակական առումով»,- փաստել է Գեւորգ Պապոյանն ու խոսել այս առումով առկա խնդիրների ու խոչընդոտների, նաեւ դրանց լուծմանն ուղղված ծրագրերի մասին:
Այնուհետեւ Գեւորգ Պապոյանը ներկայացրել է Հայաստանի տնտեսական զարգացման մի շարք ցուցանիշներ, պատասխանել պատգամավորների հարցերին՝ անդրադառնալով ԵԱՏՄ շուկայում հայ արտադրողների իրավունքների պաշտպանությանն ու հայկական ծագման ապրանքների վաճառքի ծավալների ավելացման հնարավորությանը: