«Ուժեղ Հայաստան» դաշինքի առաջնորդ Սամվել Կարապետյանն իրենց շանսերը հիմա էլ է 100 տոկոս գնահատում: Այդ մասին ռուսաստանցի մեծահարուստ գործարարը հայտարարեց այսօր՝ դատարանի մոտ ճեպազրույցում պատասխանելով «Ազատության» հարցին: Միաժամանակ, նա ընդգծեց. – «Չէ, 100 տոկոս չենք հավաքում»:
Հարցին՝ կհեռանա՞ արդյոք քաղաքականությունից, եթե չանցնեն խորհրդարան, Կարապետյանը հակադարձեց. – «Այդ «եթե»-ն չկա, մենք հաղթելու ենք, ինչի՞ համար եք ուզում անպայման ինձ սխալ ուղղության վրա դնեք»:
Անդրադառնալով Ռուսաստանի կողմից ընտրություններից առաջ Հայաստանի նկատմամբ կիրառվող սահմանափակումներին՝ ռուսաստանցի գործարարը պնդեց. – «Ռուսաստանի ճնշումները Նիկոլ Փաշինյանի մասին են, ես դրա հետ գործ չունեմ՝ ճնշում են, չեն ճնշում»:
Դեռ ապրիլի կեսերին էր Սամվել Կարապետյանը հայտարարել, թե իրենց շանսերը ընտրություններում գնահատում են «ուղիղ 100 տոկոս»: