Եվրամիությունը քննադատել է Ռուսաստանի կողմից Հայաստանի վրա ճնշում գործադրելու փորձերը՝ հունիսի 7-ին նախատեսված խորհրդարանական ընտրություններից առաջ։
ԵՄ արտաքին քաղաքականության խոսնակ Անուար Էլ Անունին հայտարարել է, որ Հայաստանը, որպես ինքնիշխան, ժողովրդավարական և անկախ պետություն, իրավունք ունի ինքնուրույն ընտրել իր զարգացման ուղին և գործընկերներին։
«Ռուսաստանը նպատակ ունի վնասել Հայաստանի տնտեսությանը և ազդել Հայաստանում խորհրդարանական ընտրությունների արդյունքի վրա։ Մենք կշարունակենք աջակցել Հայաստանին նման հարկադրանքի փորձերը հաղթահարելու համար», — նշել է նա։
Հայտարարությունը հնչել է այն բանից հետո, երբ Մոսկվան կոչ էր արել հնարավորինս շուտ հանրաքվե անցկացնել Հայաստանի՝ Եվրամիությանը անդամակցելու ձգտումների վերաբերյալ։
Հայաստանը, որը պաշտոնապես շարունակում է դաշնակցային հարաբերություններ պահպանել Ռուսաստանի հետ, վերջին տարիներին ակտիվորեն զարգացնում է կապերը Եվրամիության հետ։ Այդ գործընթացը պայմանավորված է նաև Ադրբեջանի հետ հակամարտությունների ընթացքում Ռուսաստանի աջակցությունից Երևանի դժգոհությամբ։
Հունիսի 7-ի խորհրդարանական ընտրությունները դիտարկվում են որպես կարևոր փորձություն վարչապետ Նիկոլ Փաշինյանի քաղաքականության համար, որը միտված է Ռուսաստանի ազդեցությունից կախվածության նվազեցմանն ու Արևմուտքի հետ համագործակցության խորացմանը։
2024 թվականին Հայաստանը սառեցրել էր անվտանգության ոլորտում համագործակցությունը Մոսկվայի հետ, իսկ 2025 թվականին ընդունել էր օրենք, որով ամրագրվել էր Եվրամիությանն անդամակցելու ձգտումը։ Ի պատասխան՝ Ռուսաստանը վերջին օրերին հետ է կանչել իր դեսպանին Երևանից խորհրդակցությունների համար և հայտարարել հայկական մրգերի ու բանջարեղենի ներմուծման նկատմամբ սահմանափակումներ կիրառելու մտադրության մասին։
Ավելի վաղ Ռուսաստանի նախագահ Վլադիմիր Պուտինը հայտարարել էր, որ անհնար է միաժամանակ անդամակցել թե՛ Եվրամիությանը, թե՛ ԵԱՏՄ-ին և կոչ էր արել հնարավորինս արագ հանրաքվե անցկացնել այդ հարցի շուրջ։