Այսօր Արագածոտնի մարզում իշխող «Քաղաքացիական պայմանագրի» քարոզարշավին՝ դասերի ժամին աշակերտների ու մանկավարժների մասնակցությունից հետո Կենտրոնական ընտրական հանձնաժողովը հիշեցրել է, որ արգելվում է նախընտրական քարոզչության ընթացքում վարչական ռեսուրսի օգտագործումը հանրային ծառայության մեջ գտնվողներին, բժշկական կազմակերպությունների, ուսումնական, նախադպրոցական հաստատությունների աշխատողներին իրենց լիազորություններն իրականացնելիս կամ ի պաշտոնե հանդես գալիս։
Հանձնաժողովը կոչ է արել նախընտրական քարոզչությունն իրականացնել Ընտրական օրենսգրքի կարգավորումների շրջանակում՝ բացատրելով, որ վարչական ռեսուրսները մարդկային, ֆինանսական և նյութական այն միջոցներն են, որոնց ընտրությունների ժամանակ տիրապետում են հանրային պաշտոններ և հանրային ծառայության պաշտոններ զբաղեցնող անձինք:
Այսօր ավելի վաղ լրագրողներն արձանագրել էին, որ վարչապետ Նիկոլ Փաշինյանի քարոզարշավին մասնակցելու էին եկել դպրոցների աշակերտներ ու ուսուցիչներ:
Կրթության նախարարությունն, իր հերթին, հայտարարել է, որ Արագածոտնի մարզում այսօր «քաղաքական քարոզարշավին դպրոցների մասնակցության գրանցված դեպքերով քննություն կանցկացնի»: Բայց ոչ նախարարությունը, ոչ էլ ԿԸՀ-ն իրենց հաղորդագրություններում կոնկրետ ՔՊ-ի անունը չեն նշել: