Իսրայէլի վարչապետ Պենիամին Նեթանիահու յայտարարած է, որ յոյս ունի յառաջիկայ տասնամեակին աստիճանաբար դադրեցնել Իսրայէլին ամերիկեան զինուորական աջակցութիւնը, որովհետեւ կը փորձեն ամրապնդել Ծոցի պետութիւններուն հետ յարաբերութիւնները:
«Կ՛ուզեմ ամերիկեան ֆինանսական աջակցութիւնը, մեր զինուորական համագործակցութեան ֆինանսական բաղադրիչը հասցնել զերոյի», ամերիկեան «Սի.Պի.Էս.» պատկերասփիւռի կայանին հետ հարցազրոյցի ընթացքին ըսած է Նեթանիահու:
Ան մանրամասնած է, որ Միացեալ Նահանգները տարեկան շուրջ 3,8 միլիառ տոլարի զինուորական օգնութիւն կը տրամադրէ Իսրայէլին: Ուաշինկթըն համաձայնած է 2018-2028 տասնամեակի համար Իսրայէլին ընդհանուր 38 միլիառ տոլար արժողութեամբ զինուորական օգնութիւն տրամադրելու:
Բայց եւ այնպէս, Նեթանիահու ընդգծած է, որ «ճիշդ ժամանակն է» վերատեսութեան ենթարկելու Միացեալ Նահանգներ-Իսրայէլ ելեւմտական համագործակցութիւնը: