Իսրայելի նախագահի իրավական խորհրդական Միխալ Զուկ-Շաֆիրը նամակ է ուղարկել վարչապետ Բենիամին Նեթանյահուի դեմ հարուցված գործերով կողմերին՝ հրավիրելով նրանց բանակցություններ վարել՝ համաձայնության հասնելու համար, նախքան վարչապետի ներման խնդրագրի քննարկումը: Այս մասին հայտարարել է Իսրայելի նախագահ Իսահակ Հերցոգի գրասենյակը։
«Երեքշաբթի երեկոյան նախագահի իրավական խորհրդական Միխալ Զուկ-Շաֆիրը նամակ է ուղարկել վարչապետ Բենիամին Նեթանյահուի դեմ հարուցված գործերով կողմերին՝ հրավիրելով նրանց բանակցություններ վարել նախագահական նստավայրում՝ համաձայնության հասնելու նպատակով:
Այս գործընթացը ներկայացնում է միայն նախնական քայլ, նախքան նախագահը կքննարկի իր ներման լիազորությունների կիրառումը: Կողմերին խնդրվել է ներկայանալ հնարավորինս շուտ», – ասվում է հայտարարության մեջ:
Իսրայելի նախագահի գրասենյակը նշել է, որ «կողմերին տեղեկացվել է, որ այս գործընթացին մասնակցելը չի կազմում համաձայնություն կամ որոշում որևէ վիճելի հարցի շուրջ և չի ազդում դատավարության ընթացքում նրանց փաստարկների վրա»: