Քովենթրի Սիթի դարձաւ այս տարեշրջանի առաջին ակումբը, որ կը բարձրանայ Անգլիոյ «Փրեմիեր լիկ»` 25 տարուան բացակայութենէ ետք:
Չելսիի եւ Անգլիոյ պատմական միջնապահներէն Ֆրանք Լամփարտի գլխաւորութեամբ, Քովենթրի վերադարձաւ «Փրեմիեր լիկ», որ 1992-էն հիմնուած էր (նախապէս` առաջին դասակարգ): Օրին անիկա հիմնադիր ակումբներէն մէկն էր «Փրեմիեր լիկ»-ի:
1987-ին Անգլիոյ բաժակակիր Քովենթրի բաւական դժուար ժամանակ անցուց եւ ինքզինք վերագտաւ Ֆրանք Լամփարտի հետ վերադառնալով իր իսկական դիրքը:
Քովենթրի 2017-2018 տարեշրջանին 4-րդ դասակարգ ինկած էր, բայց «բաց կապոյտ երկինքի գոյն»-ի բանակը` համակիրները, վերջապէս առիթ ունեցան վայելելու ուրախութիւնը` իրենց վերջին մրցումին (շաբաթավերջին) 1-1 արդիւնքով հաւասարութիւն արձանագրելէ ետք Պլեքպըրնի հետ:
Ակումբի սեփականատէր Տոկ Քինկ մէկ տարեշրջանի ձրի տոմս նուիրեց ակումբի 5 հազար համակիրներուն:
Լամփարտ, որ 2024-ի նոյեմբերէն լուրջ աշխատանք տարաւ պատրաստելու խումբը, վերջապէս կրցաւ իր աշխատանքին «պտուղը քաղել»:
Առաջին տարեշրջանին 5-րդ դիրքը գրաւելէ ետք Քովենթրի 10 կէտերու առաւելութիւն ունի Միլուոլի վրայ: Իփսուիչ, Սաութհեմփթըն, Միտըլզպրօ Հալ Սիթի, Ռեքսհամ եւ Տերպի Քաունթի կը պայքարին մնացեալ 2 դիրքերուն համար:
2001-ին խումբը փոխանցուած էր Բ. դասակարգ, ապա 2012-ին` Գ. դասակարգ եւ 2017-ին` Դ. դասակարգ:
2018-ին պարտութեան մատնելէ ետք Էքզեթեր Սիթին Քովենթրի բարձրացաւ Գ. դասակարգ, ապա 2020-ին դառնալէ ետք Գ. դասակարգի ախոյեան` բարձրացաւ Բ. դասակարգ:
Քովենթրի 106 տարիներ (1899-էն 2025) իր մրցումները կը կատարէր «Հայֆիլտ Ռոտ» դաշտին վրայ: «Քովենթրի Արենա» դաշտը փոխարինեց «Հայֆիլտ Ռոտ»-ը 2005-ին, բայց 32 հազարնոց դաշտը միշտ ալ հարցեր ունենալով շատ քիչ մրցումներ ընդունեց 2013-էն 2025-ի օգոստոսը, վարձքի պատճառով: Այդ թուականին ակումբը վերջնականապէս դարձաւ «Քովենթրի Արենա»-ի սեփականատէրը: