Սպիտակ տան խորհրդատու Սթիւըն Միլլըր ամերիկեան «Ֆոքս Նիուզ» պատկերասփիւռի կայանին յայտնեց, որ Միացեալ Նահանգներ Իրանի նկատմամբ բոլոր ընտրանքները կը պահէ սեղանի վրայ:
Ան նշեց, որ Միացեալ Նահանգներու նախագահ Տանըլտ Թրամփ մեծապէս կը մասնակցի Թեհրանի հետ ընթացող բանակցութիւններու ուրուագծման:
Միլլըր յայտնեց, որ Ուաշինկթըն խաղաղութեան ու կայունութեան հաստատման կը ձգտի, սակայն Իրանի հիւլէական զէնք ունենալը պիտի չընդունի:
Սպիտակ տան խորհրդատուն նշեց, որ զինուորական ընտրանքը, ներառեալ իրանեան ելեկտրակայանները տարիներով խանգարող հարուածները տակաւին ի զօրու են` աւելցնելով, որ հաստատուած պաշարումն ու ուժանիւթի շրջանառութեան վրայ սահմանափակումները իրանեան տնտեսութեան վրայ հետզհետէ աճող ճնշում կը բանեցնեն:
Սպիտակ տունը երէկ յայտարարեց. «Իրապէս Իրանի հետ ուղղակի բանակցութիւններու հաւանականութեան շուրջ քննարկումներ տեղի կ՛ունենան»:
«Տակաւին աշխուժ կերպով ներքաշուած ենք Իրանի վերաբերեալ բանակցութիւններուն մէջ եւ Իրանի հետ համաձայնութեան ձեռք բերման առիթին նկատմամբ վստահ կը զգանք», նշեց Սպիտակ տունը:
Իրանի վարչակարգի շահի ճշդման համախմբումի անդամ Մուհսեն Ռիտայի յայտնեց, որ Իրան «Հորմուզի նեղուցը պիտի չլքէ, մինչեւ որ իր ամբողջ իրաւունքները ապահովուին»:
Ան նշեց, որ ծովային պաշարումը ոչ զինուորական քայլ է եւ կարելի է զայն ճեղքել` աւելցնելով. «Անիկա բանակցութիւններուն մէջ Իրանի դիրքորոշման վրայ որեւէ ձեւով պիտի չազդէ»:
«Ամերիկացիները մեծապէս կը վախնան երկարատեւ պատերազմներէն, իսկ մենք անոնց փորձառու ենք», ըսաւ Ռիտայի:
«Ուաշինկթըն պատերազմին վերջ տալու յստակ ծրագիր մը չունի եւ ձախողութենէն ետք ծրագիրէ ծրագիր կ՛անցնի», յայտնեց իրանցի պաշտօնատարը:
«Հակառակորդ կողմին հետ հիւլէական թղթածրարին խնդիրը ռումբը չէ, այլ հիւլէական ճարտարագիտութիւնը», նշեց Ռիտայի:
Փաքիստանի արտաքին գործոց նախարարութիւնը երէկ յայտարարեց, թէ Միացեալ Նահանգներու եւ Իրանի միջեւ բանակցութիւններու յառաջիկայ փուլի թուականը չէ ճշդուած:
Իրանցի բարձրաստիճան պաշտօնատար մը «Ռոյթըրզ» լրատու գործակալութեան յայտնեց, որ փաքիստանեան բանակի հրամանատարի Իրան այցելութիւնը նպաստած է կարգ մը խնդիրներու շուրջ տարակարծութիւններու նուազեցման:
Իրանցի պաշտօնատարը լրատու գործակալութեան նշեց, որ այս այցելութեամբ զինադադարի երկարաձգման եւ Միացեալ Նահանգներու հետ բանակցութիւններու երկրորդ փուլի կայացման նկատմամբ յոյսերը բարձրացած են»: