Տակաւին յստակ չէ, թէ Իրանի ֆութպոլի ազգային խումբը պիտի մասնակցի՞ ամրան տեղի ունենալիք Մոնտիալին, թէ՞ ոչ:
Շատ կարծիքներ կան մասնակցութեան կամ պոյքոթի վերաբերեալ: Միացեալ Նահանգներ բնակող իրանցիներ կը կարծեն, թէ Իրան պէտք է մասնակցի, որովհետեւ հարցը քաղաքական է եւ մարզիկներուն չի վերաբերիր, հակառակ անոր որ Միացեալ Նահանգներու նախագահը Տանըլտ Թրամփ անցեալ ամիս հրապարակաւ յայտնած էր, թէ աւելի լաւ է Իրանի չմասնակցիլը, մանաւանդ որ անոնց ապահովութիւնը չի կրնար երաշխաւորել:
Աւելի տարեց իրանցիներ, որոնք 1979-էն գաղթած են Իրանէն, կը նախընտրեն Իրանի չմասնակցիլը, մանաւանդ որ այս խումբը այժմու վարչակարգի խումբն է: Ինչպէս ըսինք, կարծիքները բաժնուած են նոյնիսկ Իրանի մէջ: Մարմնակրթութեան նախարարը որոշած է չմասնակցիլ Մոնտիալին, բայց օրեր ետք ֆութպոլի ֆետերասիոնի նախագահը յայտնած էր, թէ Իրան պատրաստ էր մասնակցելու` առաջարկելով ՖԻՖԱ-ին, որ մրցումները Միացեալ Նահանգներէն փոխադրէ Մեքսիքա:
ՖԻՖԱ-ն մերժած էր այդ առաջարկը, մանաւանդ որ շատ խաչաձեւումներու առջեւ կրնայ գտնուիլ, երբ բազմաթիւ համակիրներ այժմէն իսկ ապահոված են իրենց պանդոկներն ու կեցութեան վայրերը:
Ըստ երեւոյթին, Իրան պիտի մասնակցի Մոնտիալին, բայց… թէ ի՞նչ կրնայ ըլլալ համակիրներուն կեցուածքը` օրերը գիտեն: