Արմավիր համայնքի սուբվենցիոն ծրագրերի հիմնական մասն այս տարի կենտրոնացված է Արմավիր քաղաքում: Լայնածավալ աշխատանքներ են նախատեսվել բազմաբնակարան շենքերի խմելու ջրագծերի կառուցման ու բակային հատվածների բարեկարգման ուղղությամբ: Կենտրոնի բազմաբնակարան շենքերի բակերն անհիշելի ժամանակներից չեն հիմնանորգվել: Մինչև բակերի բարեկարգումը փոխվում են խմելու ջրագծերը:
Արմավիր քաղաքի կենտրոնում բազմաբնակարան շենքերի բակերն անբարեկարգ են։ Դրանք քամիների ժամանակ լցվում են փոշով, տեղումների ժամանակ ծածկվում ջրափոսերով: Այդ տարածքները մի քանի տասնամյակ չեն հիմնանորոգվել։ Փոքր-ինչ պահպանված ասֆալտն էլ քանդվել է 2000-ականների սկզբին՝ նոր ջրատար կառուցելու համար: Բայց հայ-գերմանական «Նոր ակունք» ծրագրի ջրագծերը երկար չծառայեցին․ երկաթե խողովակները, կոռոզիայի ենթարկվելով, հաճախ են վթարվում, որի հետևանքով դարձյալ քանդվում են փողոցները: Այդ խողովակներով հոսող ջուրը բնակիչները չեն խմում, օգտագործում են միայն կենցաղում՝ ասում է Սիրուհին:
«Ես միշտ Թալինի ջուր եմ գնում, իսկ մեր ծորակի ջուրը շատ անորակ է։ Եթե փորձես 5 լ ջուր եռացնել, մի քիչ ջուրը եռում է, սպիտակ աղը նստում է պատերին, մի աղաման աղ կարելի է հավաքել: Իսկ եթե լցնում ես ամանի մեջ՝ 2-րդ օրը ամանի պատերը լպրծուն են դառնում, գարշահոտ է գալիս, տհաճ տիղմի հոտ. կամ խողովակաշարից է, կամ ջրից»:
Արմավիր համայնքի ու կառավարության համաֆինանսավորմամբ դեռ անցած տարի էր նախատեսվել քաղաքի կենտրոնում փոխել խմելու ջրագծերն ու ասֆալտապատել բակերը: Հիմա նոր ջրագծեր են կառուցում Հանրապետության ու Չարենիցի փողոցների 6 բազմաբնակարան շենքերի բակերում: Այդ աշխատանքները չեն խանգարում ընդհանուր ջրամատակարարմանը՝ ասում է շինաշախատանքների ղեկավար Մուշեղ Խաչատրյանը:
«Հին ջրագծերի հետ մենք ընդհանրապես գործ չունենք, հինը մնում է, մենք նորը միացնում ենք գլխավոր ջրագծին, այն հատվածներոնմ, որտեղ փոխել ենք: Հնի հետ ընդհանուր կապը խզվում է»:
Այսինքն՝ հին երկաթե ջրագծերը նույնությամբ մնում են գետնի տակ, զուգահեռ կառուցում են պլաստմասսե խողովակներով նոր ջրագծեր:
«160 մմ տրամաչափի խողովակով գլխավոր ջրագիծն է անցկացվում, 110 մմ-ով՝ մուտքերի դիմացինը, իսկ 63 մմ տրամաչափով՝ մուտքերինը: Խրամուղիները փորվում են 1մ 20 սմ խորությամբ, հողը հետլիցք չի արվում, փոխարենը խողովակը ներքից ու վերևից ծածկվում է ավազե շերտով ու ջարդած գլաքարով»:
Խրամուղիներից հանված հողը չի լցվում նույն փոսը, տեղափոխվում է այլ վայր: Խմելու ջրագծերի կառուցմանը հաճախ խոչընդոտում են կոյուղու խցանումները, որոնց վերացումը ժամանակատար է: Իսկ նախագծով խմելու ջրագծերը մոտ 2մ հեռավորությամբ են կառուցվում կոյուղագծից, երբեմն՝ ավելի մոտ:
«Աշխատանք ենք անում, մեզ համար էլ է այդ հոտը տհաճ, կողքը գործ ենք անում, այն կարող է լցվել մեր փորած փոսի մեջ: Մենք թույլ չենք տալիս, զեկուցում ենք, գալիս, վերացնում են խցանումը, որ մենք շարունակենք մեր աշխատանքը»:
Արմավիր քաղաքում կոյուղագծերն ավելի վատ վիճակում են, սակայն դրանք չեն ներառվում ենթակառուցվածքների բարելավման որևէ ծրագրում:
Նոր ջրագծեր կառուցողներն Արմավիրի մարզի Քարակերտ գյուղից են: Արդեն մի քանի տարվա փորձ ունեն, իրենց գործում վարպետացել են: Կիրառում են նոր տեխնոլոգիաներ, որոնք կրճատում են ժամանակն ու արագացնում գործընթացը:
«Հատուկ սարքով, որը տաքացվում է մինչև 320 աստիճան, պլաստմասսե խողովակները միացնում ենք իրար: Մենք փորձարկում ենք ծածկման աշխատանքներից հետո: Բարձր ճնշում ենք տալիս, փորձարկում խողովակները, եթե թերություններ կան, վերացնում ենք: Բայց, փառք Աստծո, մինչև հիմա այդպիսի դեպքեր չեն գրանցվել: Շատ լավ է»:
Աշխատանքները շուտով կավարտվեն, որից հետո դարձյալ սուբվենցիոն ծրագրով կսկսվի բակերի ասֆալտապատումը: Արմավիր քաղաքի տարբեր թաղամասերում նախորդ տարիներին խմելու ջրագծերը փոխարինվել են նորով: Բնակիչները ջրի համային որոշ փոփոխություններ նկատել են, բայց որակը, ասում են, չի փոխվել: Արմավիրցիները շարունակում են խմելու ջուրը գնել ջրի վաճառի սարքերից, որոնք լիցքավորվում են Թալինի ջրով: Նրանք հույս ունեն, որ խմելու ջրագծերն ամբողջությամբ փոխելուց հետո Արմավիր քաղաքի ջրի աղբյուրն էլ կփոխվի, և արտեզյան ջրի փոխարեն իրենք էլ ծորակից որակյալ ջուր կխմեն: