Որպես կանոն ամուսնության պետական գրանցումը կատարվում է ՔԿԱԳ մարմիններում։ 2026 թվականի ապրիլի 3-ից ուժի մեջ է մտել նոր կարգ, որը սահմանում է ՔԿԱԳ-ից դուրս ամուսնության գրանցման դեպքերը և պայմանները։
Ինչպես տեղեկացնում է Iravaban.net-ը, ՀՀ արդարադատության նախարարի 2026 թվականի ապրիլի 3-ի N 166-Ն հրամանով սահմանվել է Քաղաքացիական կացության ակտերի գրանցման գործակալության սպասարկման կենտրոններից դուրս ամուսնության գրանցման նոր կարգ։
Կառավարության որոշմամբ, ապրիլի 3-ից, ուժը կորցրած ճանաչվեց կառավարության 2012 թվականի որոշումը, որը թույլ էր տալիս որոշակի դեպքերում ամուսնություն գրանցել ՔԿԱԳ-ից դուրս։ Այդ մասին Iravaban.net-ը նյութ է հրապարակել այստեղ։
Ե՞րբ է հնարավոր ՔԿԱԳ-ից դուրս ամուսնություն գրանցել
Նոր հրամանի համաձայն՝ ՔԿԱԳ-ից դուրս ամուսնության գրանցում կարող է կատարվել հետևյալ դեպքերում՝
- ամուսնացող անձանց կողմից ներկայացված համապատասխան դիմումի առկայության դեպքում,
- կալանավորված կամ ազատազրկման վայրերում պատիժ կրող անձանց հետ կամ նրանց միջև ամուսնության պետական գրանցման համար ներկայացված համապատասխան դիմումի առկայության դեպքում։
Որտե՞ղ է արգելված ՔԿԱԳ-ից դուրս ամուսնություն գրանցել
Հրամանի համաձայն՝ ՔԿԱԳ-ից դուրս ամուսնության գրանցում չի կարող կատարվել՝
- օդային կամ ջրային տարածքում (օդապարիկ, ինքնաթիռ, նավ և այլն),
- բնության հատուկ պահպանվող տարածքում (ազգային պարկ, արգելոց և այլն),
- դժվարհասանելի տարածքում (լեռ, ժայռ և այլն),
- արտակարգ իրավիճակներում և ռազմական դրության ժամանակ,
- ընդհանուր օգտագործման այնպիսի տարածքներում, որտեղ ամուսնության պետական գրանցումը կարող է խոչընդոտներ ստեղծել ամուսնացող անձանց կամ այլոց կյանքի կամ առողջության համար (տանիք, կամուրջ, ճանապարհ և այլն)։
Դիմումի ներկայացման ժամկետ
ՔԿԱԳ-ից դուրս ամուսնության գրանցման համար դիմումը պետք է ներկայացվի ամուսնության պետական գրանցման օրվանից առնվազն 7 օր առաջ։
Ոչ աշխատանքային օրերին ամուսնություն գրանցելու դեպքում վկայականում նշվում է ոչ աշխատանքային օրերին նախորդող վերջին աշխատանքային օրը։
Վճարի չափը
Հրամանի համաձայն՝ ՔԿԱԳ-ից դուրս ամուսնություն գրանցելու դիմումին պետք է կցել ՀՀ կառավարության 2021 թվականի հուլիսի 22-ի N 1188-Ն որոշմամբ սահմանված լրացուցիչ ծառայության վճարը պետական բյուջե վճարված լինելը հավաստող ապացույցը։
N 1188-Ն որոշման համաձայն՝ ՔԿԱԳ-ից դուրս ամուսնության գրանցման վճարը կազմում է՝
- 40,000 դրամ,
- ոչ աշխատանքային ժամերին և (կամ) ոչ աշխատանքային օրերին՝ 60,000 դրամ։
Կալանավորված կամ ազատազրկման վայրերում պատիժ կրող անձանց հետ կամ նրանց միջև ամուսնություն գրանցելու դեպքում դիմումը պետք է հաստատված լինի քրեակատարողական հաստատության ղեկավարի ստորագրությամբ և հաստատության կնիքով։
Տարածքի պահանջներ
Հրամանի համաձայն՝ ՔԿԱԳ-ից դուրս ամուսնությունը գրանցվում է միայն ՔԿԱԳ սպասարկման կենտրոնի աշխատակիցների կողմից՝ համապատասխան այնպիսի տարածքում, որը պետք է կահավորված լինի սեղանով և Հայաստանի Հանրապետության պետական դրոշով։
Աշխատակիցների հագուստի պահանջներ
ՔԿԱԳ-ից դուրս ամուսնություն գրանցելու համար սպասարկման կենտրոնի աշխատակիցը պետք է լինի բացառապես դասական ոճի հագուստով ու խնամված արտաքին տեսքով։
Իգական սեռի աշխատակիցներին չի թույլատրվում ներկայանալ տոնական կամ խիստ արտահայտված շպարով, սանրվածքով, չափազանց մեծ և ուշադրություն գրավող զարդերով, իսկ արական սեռի աշխատակիցներին՝ չխնամված սանրվածքով և մորուքով։
Ամուսնության արարողության տեքստ
Հրամանով սահմանվել է հատուկ տեքստ, որով պետք է առաջնորդվել ՔԿԱԳ-ից դուրս ամուսնություն գրանցելիս։
Տեքստը սկսվում է հետևյալ բառերով՝ «Հարգելի՛ քաղաքացիներ (նշել անուն ազգանունները), հաշվի առնելով ընտանիքի ինստիտուտի առանձնահատուկ դերը և նշանականությունը հասարակության բնականոն զարգացման հարցում և հիմք ընդունելով ամուսնություն կնքելու ձեր կամահայտնությունը…»։
Տեքստը ներառում է երկու հիմնական հարց՝
- Համաձա՞յն եք դառնալու օրինական ամուսիններ
- Արդյո՞ք ձեր ամուսնություն գրանցելու փոխադարձ համաձայնությունը հիմնված է կամավորության վրա
Դրական պատասխաններից հետո ամուսնացողներն իրենց ստորագրություններով հաստատում են համաձայնությունը, և աշխատակիցը հայտարարում է նրանց օրինական ամուսիններ։
Փոխադրման ծախսեր
Հրամանի համաձայն՝ ՔԿԱԳ-ից դուրս ամուսնություն գրանցելու համար սպասարկման կենտրոնի աշխատակիցի փոխադրումը պետական բյուջեի միջոցների հաշվին է։
Վարքագծի կանոններ
ՔԿԱԳ-ից դուրս ամուսնություն իրականացնելիս աշխատակիցը պետք է հետևի քաղաքացիական ծառայողի վարքագծի կանոններին, հաղորդակցվելիս դրսևորի բարեկրթություն, իսկ ամուսնության գրանցումն ավարտելուց անմիջապես հետո հեռանա տարածքից։
Նոր կարգը ուժի մեջ է մտել 2026 թվականի ապրիլի 3-ին, – տեղեկացնում է Iravaban.net-ը։
Հավելյալ տեղեկությունների համար կարող եք այցելել Iravaban.net մասնագիտական առցանց մեդիա։
Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։ Կոնկրետ իրավիճակներում իրավաբանական խորհրդատվություն ստանալու համար անհրաժեշտ է դիմել մասնագետի։