Մշակոյթի նախարար Ղասսան Սալամէ «Ժազիրա» արբանեակային պատկերասփիւռի կայանին հետ զրոյցի ընթացքին յայտնեց, որ «Իսրայէլ Հարաւային Լիբանանի մէջ նոր շրջաններու կանոնաւոր կլանման գործողութիւն կը կատարէ»` նշելով, որ ատոր նպատակը արգելակիչ գօտիի ստեղծումն է:
«Իսրայէլ տեղահանման եւ հողի հաւասարեցման գործողութիւն կը կատարէ հարաւային Լիբանանի բնակիչներուն տունդարձը արգիլելու համար», աւելցուց նախարարը:
«Աշխատանք կը տանինք Իսրայէլի վրայ դիւանագիտական միջոցներով ճնշում բանեցնելու համար», ըսաւ ան:
«Իսրայէլի հետ բանակցութիւնները ներկայիս խանգարուած են բազմաթիւ պատճառներով», յայտնեց Սալամէ` նշելով. «Իսրայէլ կը մերժէ զինադադարը, եւ գոյութիւն ունի բանակցային պատուիրակութեան կազմութեան վերաբերեալ ներքին խոչընդոտ»:
«Արտաքին կողմեր, մասնաւորաբար Ֆրանսան, ընդունեցին Իսրայէլի հետ բանակցութիւններու դիմելու մեր առաջարկը», ըսաւ մշակոյթի նախարարը:
«Իսրայէլի հետ ուղղակի բանակցութեան սկզբունքը մերժուած չէ, սակայն Լիբանանի մէջ քննարկումը պայմաններուն շուրջ է», յայտարարեց Սալամէ` աւելցնելով. «Բանակցութեան թղթածրարին շուրջ Հըզպալլայի հետ ուղղակի հաղորդակցութիւն չկայ»:
«Հըզպալլա Իրանի գերագոյն հոգեւոր պետ Ալի Խամենէիի ահաբեկումէն ետք որոշեց Իսրայէլի հետ ճակատումի մէջ մտնել առանց կառավարութեան հետ խորհրդակցելու», ըսաւ ան:
«Կառավարութիւնը կը պնդէ, որ զինադադարը առաջին քայլն է, եւ պէտք է բոլորը զայն յարգեն, եթէ Իսրայէլ զայն ընդունի», նշեց Սալամէ: