Պրազիլի ֆութպոլի ազգային խումբը այս ամիս բարեկամական մրցումներ պիտի կատարէ Միացեալ Նահանգներու մէջ, եւ մարզիչ Քարլօ Անչելոթթի արդէն իսկ ընտրած է այդ մրցումներուն մասնակցող մարզիկները` դուրս ձգելով Նէյմարը:
34 տարեկան Նէյմար, որ Պրազիլի նախկին խմբապետն էր, պատրաստ վիճակի մէջ չէ 2023-ի հոկտեմբերէն ծունկի ետեւի կապերու գործողութենէն ետք եւ իր մակարդակը վերագտած չէ:
Պրազիլ Պոսթընի մէջ (26 մարտին) պիտի մրցի Ֆրանսայի դէմ, իսկ Օրլանտոյի մէջ Խրուաթիոյ դէմ 4 օր ետք:
Անչելոթթի յստակօրէն բացատրեց, թէ այս ընտրուած մարզիկները նկատի առնուած են, որովհետեւ 100 տոկոս լաւ վիճակի մէջ են: «Մենք վերջերս ունեցանք կարեւոր մարզիկներ, որոնք այժմ վիրաւոր են, ինչպէս` Էտեր Միլիթաօ, Պրունօ Կիմարայէշ, Էսթեւաօ եւ Ռոտրիկօ»:
Իր վերջին մրցումին, Նէյմար լաւ ելոյթ չունեցաւ Սանթոսի հետ` Քորինթիանսի դէմ (1-1) մրցումին:
Անչելոթթիի յայտարարութենէն ետք Նէյմար Սան Փաուլոյի մէջ յայտնած էր, թէ տխուր է, որ նկատի առնուած չէ, բայց «իմ կեդրոնացումս կը շարունակուի օրէ օր, փորձէ փորձ, մրցումէ մրցում: Պիտի հասնինք մեր նպատակին, եւ տակաւին վերջնական խմբակը կայ», ըսաւ ան:
Մոնտիալի կազմը պիտի յայտարարուի 18 մայիսին, եւ Պրազիլի վերջին փորձ-մրցումը պիտի ըլլայ Փանամայի դէմ 31 մայիսին, Ռիօ Տէ Ժանէյրոյի մէջ:
Ստորեւ` Անչելոթթիի կազմը.
ԲԵՐԴԱՊԱՀՆԵՐ.- Ալիսոն (Լիվըրփուլ), Պենթօ (Նասր), Էտերսոն (Ֆեներպահչէ):
ՅԵՏՍԱՊԱՀՆԵՐ.- Ալեքս Սանտրօ (Ֆլամենկօ), Տանիլօ (Ֆլամենկօ), Լէօ Փերէյրա (Ֆլամենկօ), Պրեմեր (Եուվենթուս), Տուկլաս Սանթոս (Զենիթ), Կապրիէլ Մակալհայես (Արսենալ), Իպանէս (Ահլի), Մարքինոս (Փարիզ Սեն Ժերմեն) եւ Ուեսլի (Ռոմա):
ՄԻՋՆԱՊԱՀՆԵՐ.- Անտրէ Սանթոս (Չելսի), Քասեմիրօ (Մանչեսթըր Եունայթըտ), Տանիլօ (Պոթաֆոկօ), Ֆապինիօ (Իթթիհատ), Կապրիէլ Սարա (Կալաթասարայ):
ՅԱՌԱՋԱՊԱՀՆԵՐ.- Էնտրիք (Լիոն), Ժոաօ Փետրօ (Չելսի), Կապրիէլ Մարթինելլի (Արսենալ), Իկոր Թիակօ (Պրենթֆորտ), Լուիս Հենրիքէ (Զենիթ), Մաթէուս Քունիա (Մանչեսթըր Եունայթըտ), Ռաֆինիա (Պարսելոնա), Ռայան (Պորնմաութ) եւ Վինիսիուս Ժունիոր (Ռէալ Մատրիտ):