Իսրայելի պաշտպանության ուժերը (ՑԱՀԱԼ) հայտարարել են, որ մարտի 16-ին սկսել են «սահմանափակ ցամաքային գործողություն» Հարավային Լիբանանում՝ ուղղված շիա «Հեզբոլլահ» շարժման դեմ։
Իսրայելական բանակի հաղորդագրության համաձայն՝ գործողության նպատակն է ամրապնդել պաշտպանական դիրքերը և ոչնչացնել խմբավորման ռազմական ենթակառուցվածքները։ Իսրայելի բանակը նշում է, որ այդ քայլը պետք է բարձրացնի Հյուսիսային Իսրայելի բնակիչների անվտանգության մակարդակը։
ՑԱՀԱԼ-ի տվյալներով՝ ցամաքային գործողությունից առաջ Իսրայելի ռազմաօդային ուժերը և հրետանին հարվածներ են հասցրել Հարավային Լիբանանում գտնվող մի շարք թիրախների, որոնք բանակը բնութագրում է որպես «ահաբեկչական ենթակառուցվածքներ»։
Մեկ օր առաջ Իրանի աջակցությունը ստացող «Հեզբոլլահ» խմբավորումը հայտարարել էր, որ Հարավային Լիբանանում իսրայելական ուժերի հետ տեղի են ունեցել «ուղղակի բախումներ»։
Ավելի վաղ Իսրայելի բանակը արդեն սկսել էր մարտավարական գործողություններ իրականացնել Լիբանանի հետ սահմանի երկայնքով՝ հայտարարելով, որ թիրախավորում է «Հեզբոլլահի» այն ենթակառուցվածքները, որոնք, ըստ Իսրայելի, օգտագործվում են երկրի դեմ հարձակումների համար՝ Իրանի աջակցությամբ։ Միևնույն ժամանակ, Իսրայելի ռազմական ղեկավարությունը մինչ այժմ լայնածավալ ցամաքային գործողության հավանականությունը գնահատել էր որպես քիչ հավանական։